Tuir informasaun ne’ebé www.tempotimor.com asesu iha pájina MOP, sesta (01/07) katak, hanesan ekipa iha KAFI Ministru Obras Públikas (MOP), Abel Pires da Silva, partisipa iha reuniaun ne’ebé lidera husi Prezidente KAFI, atual Vise Primeiru Ministru no Ministru Planu no Ordenamentu (V-PM no MPO), José Reis iha salaun enkontru Ajensia Dezenvolvimentu Nasionál (ADN), Hudi-Laran, Dili.
Iha reuniaun KAFI ne’e kontinua diskute kona-ba implmenetasaun projetu infraestrutura ne’ebé finansiadu husi Fundu Infraestrutura hanesan progressu ba projetu estrada munisipál iha munisípiu Baukau, liga Postu Administrativu Laga ba Baguia, husi Uaiaka ba Postu Administrativu Kelikai to'o parte balun husi postu administrativu Ossu, munisípiu Vikeké nian inklui halo diskusaun ba projetu sira ne'ébé la’o hela iha munisípiu sira.
Aliende ne’e aprezenta mós projetu sira ne’ebé daudauk ne’e iha hela estudu ou Dezeñu Enjiñária Detalladu (DED), inklui projetu sira ne’ebé la’o hela iha prosesu aprovizionamentu.
Enkontru KAFI ne'e lidera husi Vise Primeiru Ministru, partisipa husi Ministru MOP rasik, Ministru Transporte no Komunikasaun (MTK), José Agustinho, Diretora Komisaun Nasionál Aprovizionamentu, Odete Vitor, Diretór Ajénsia Dezenvolvimentu Nasionál (ADN), Mariano Reinato inklui tékniku sira. (*)