Tuir informasaun ne’ebé www.tempotimor.com asesu iha pájina MOP, sesta (01/07) katak, servisu emeréjnsia ne’ebé halo, tanba kauza husi sedimentasaun ne’ebé nakonu iha mota, halo bee sulit tuir estrada defikuldade movimentasaun transporte no komunidade nian iha área refere.

Kona-ba Ponte Dilór mak daudauk ne’e tékniku sira prepara ona dezeñu emerjénsia no sei hetan verifikasaun husi Ajénsia Dezenvolvimentu Nasionál (ADN) hodi halo normalizasaun emidiatamente, no espera katak iha fulan-Jullu nia-laran ADN bele verifika ona.

“Ponte Welolo agora tékniku sira halo intervensaun tiha ona, agora daudauk ne’e ita uza intervensaun husi IJE parte leten, mais parte kraik ne’e mós projetu emerjénsia ida ba normalizasaun mota, kompaña iha tiha ona, sira asina ona kontratu agora iha ne’eba ona”, dehan nia.

Maibé kona-ba ponte Dilór sei presiza semana ida tan tanba dezeñu urjentimente prepara tiha ona mais prosesu iha sistema presiza hetan verifikasaun husi ADN.

“Ami antisipa katak iha semana ida ka rua tan ne’e ADN verifika ona, tanba obra iha ne’eba ne’e obra emerjénsia sei ezekuta, iha fulan-Jullu nia-laran la’os iha tinan ida-ne’e”, afirma Ministru.

Antes ne’e haree IJE.IP la sériu atende mota Welolo nune’e, Ministru Abel hatete, nia parte ba vizita rasik, daudauk ne’e mákina 4 ka 5 mak iha ne’eba la’o hela.

“Ita-boot sira bele ba verifika, iha pájina facebook IJE mós sira update iha ne’eba, ne’ebé obra la’o hela, obra rua, ida IJE no ida husi kompaña ne’ebé mak halo normalizasaun emerjénsia”, informa nia.

Ministru mós esplika kona-ba ponte Bilimau ne’ebé liga postu administrativu Hatulia, Munisípiu Ermera ba Postu Administrativu Kailaku, Munisípiu Bobonaro katak, projetu emerjénsia ba ponte refere Ministériu Obras Públikas asina ona kontratu ho kompaña hodi halo normalizasaun.

“Ponte Bilimau kontratu ita asina tiha ona, ne’e projetu emerjénsia, ha’u orienta katak agora tenke la’o ona, tanba ita laiha problema ida, kompaña manán na’in iha ona, ita asina tan kontratu ona tenke ezekuta”, esplika Ministru.

Ministru sei orienta tékniku sira hodi haree konfirma ho kompaña implementadór hodi ezekuta ona projetu emerjénsia ba normalizasaun ponte refere, tanba kontratu iha ona.

Antes ne’e iha loron 18 Juñu 2022, Ministru hala’o observasaun ba estrada no ponte husi kapitál munisípiu Manatutu ba to’o Postu Administrativu Natarbora no husi Natarbora ba Vikeké maibé la to’o Vikek’e tanba bee mota Welolo nian sulin tuir estrada iha área refere,.

Ho problema ne’e orienta kedas Prezidente IJE.IP, Hermenegilda da Costa Laurentina, Diretór Jerál Obras Públikas (DJOP), Rui Hernani, no Diretór Nasionál Estrada, Ponte no Kontrollu i Seias (DNEPCC), Milton Ramanata de Castro Monteiro, no tékniku sira hodi halo intervensaun emerjénsia atu nune’e fasilita hikas komunidade no transporte públiku iha fatin refere. (*)