“Dezeñu la’o ona ADN (Ajénsia Dezenvolvimentu Nasionál) verifika tiha ona, kontratu mós asina tiha ona, ne’ebé dentru de Jullu”, deklara Ministru Abel ba jornalista sira iha Palásiu Governu.
Ba Ponte provizóriu ne’e, tanba prosesu ida ba ponte ida pronte ne’e kleur parese udan mai tan mós seidauk hotu entaun rezolve ho ponte temporáriu i ida-ne’e iha ona, agora projetu ezekuta ona, nia orsamentu la to’o rihun $100, kuaze $90.
“Kompaña ha’u la lembra nia naran mais kompaña iha tiha ona, see la sala kompaña ne’e mak instala ponte besi ne’e iha Mota Masin (iha fronteira Mota Masin, Covalima) entaun obra ita atu dezmonta ne’e di’ak liu sira tanba sira mak hatene, ne’ebé ita fó ba sira para sira dezmonta lori mai Dili, monta fali iha ne’e, depois ida be horbainhirak kria problema dala-barak ne’e ita sobu. Durasaun ba tempu ne’e iha fulan ida-ne’e, iha fulan-Jullu nia-laran ne’e bele halo ona”, dehan nia.
Desizaun sobu ponte Bekussi bazeia ba orientasaun husi Primeiru Ministru (PM), Jenerál Taur Matan Ruak, hafoin kalamidade 04 Abril 2021 ne’ebé turi observasaun dezeñu ba ponte ne’e mak ladún di’ak sai kauza ba inundasaun iha Taibessi iha tinan sira ikus. (*)
