“Iha realidade, ita gasta ona osan Povu nian ho maneira ida ne’ebé mak la-sustentável; em termos de Produtu Internu Bruto, Timor-Leste nia despesa kuaze 90%, despesa ida ne’ebé maka’as liu iha mundu”, dehan nia iha Ministériu Finansas, Aitarak Laran, kinta (30/06).

Tanba hahú iha tinan 2009 tendénsia output ka osan sai sa'e ba bebeik, no produtu laborál limitadu ba bebeik.

“Mesmo ke ho orsamentu ne’ebé boot, saida mak ita haree desde tinan 2009 mak tendénsia output ne’ebé tun hela de’it, ita-nia produtividade laborál limitadu tebes tanba menus investimentu iha ita-nia kapitál umanu, no reseita doméstika seidauk atinje 10% husi ita-nia Produtu Internu Bruto tanba impostu ne’ebé ki’ik”, informa nia.

Tanba realidade ne’ebé hatudu halo konstrusaun ida sira iha rai laran laiha ema ne’ebé matenek kona-ba área refere maibé hatama ema tuir nia hakarak la bazeia ba nia esperiénsia servisu no nia abilidade sira.

“Ohin loron ita bele iha estrada ne’ebé di’ak maibé dalaruma ita laiha enjeñeiru ne’ebé di’ak hodi konstrui estrada foun sira ne’e no halo servisus manutensaun báziku ba estrada hirak ne’e”, hateten nia.

Tanba ne’e, importante tebes atu servisu hamutuk hodi garante katak Governu nia esforsu koletivu sira bele kontribui hasa’e efisiénsia hodi responde ba problema estruturál, hanesan pobreza, dezempregu, enkuantu kontinua presta servisu ba Povu.

Ho Lei das Grandes Opções do Plano hamutuk ho Orsamentu pur Programas ne’ebé implementa ona desde 2020, sei permite atu muda husi perspetiva ne’ebé sentradu ba taxa ezekusaun orsamentu pur item, ba perspetiva ne’ebé orientadu ba taxa implementasaun medida espesífiku sira.

Nune’e, utilizasaun rekursu Orsamentu Jerál Estadu (OJE) no susesu sira husi Governu nia asaun sei fasil liután atu sukat. (*)