Tuir informasaun ne’ebé www.tempotimor.com asesu iha pájina MOP, domingu (26/06) katak, Ministru Abel Pires da Silva, akompaña husi Direitor Jerál Abitasaun Urbanismu, Roger Tortuliano Belo ho tékniku sira ne'ebé hola parte iha ekípa avaliasaun ba projetu (PET) hala'o enkontru ho Reprezentante Rezidente Kooperasaun Finanseira Internasionál (IFC) iha Timor-Leste, Sr. David Freedman, iha salaun reuniaun Gabinete MOP, Kaikoli-Dili.
Reuniaun ne’e hanesan parte husi enkontru kontinuasaun iha loron segunda (20/06) iha ambitu aselera implementasaun projetu abitasaun ba harii uma unidade 2000 iha Halidolar, suku Hera, postu administrativu Kristu Rei, munisípiu Dili.
Enkontru ida ne'e ho objetivu atu hare'e no apresia ba timeline ne’ebé hetan ona reve husi ekípa avaliasaun servisu no IFC hodi guia atividade ka atuasaun sira kona-ba projetu ne’e ho lais liután sein prejudika ba ninia kualidade projetu sira.
Hafoin hato'o ninia apresiasaun ba esforsu ne'ebe mak ekipa tékniku husi parte Governu Timor-Leste no IFC halo, Ministru Obras Públikas, Abel informa iha enkontru atu prosesu hirak ne'e kontinua lori ba oin hodi bele sai ezemplu ida hodi rezolve problema habitasaun no liga ho aspeitu sosiál sira seluk ne'ebé mak durante ne'e enfrenta liliu iha área urbana nian.
Iha enkontru ne'e, IFC ne’ebé mak resposabiliza hodi halo estudu viabilidade no analize merkadu no seluk tan, ba abitasaun ho presu assessivel nian hato'o katak, etapa no atuasaun esensiál sira ne'ebé mak Governu Timor-Leste hamutuk ho entidade relevante sira presiza atu haree antes tama ba faze konstrusaun.
Projetu abilitasaun ho presu assesivel ida-ne'e hanesan projetu abitasaun ne'ebe mak jere ho modalidade parseria públika-privada (PPP) entre Governu Timor-Leste no IFC liuhusi akordu Financial Advisory Service Agreement (FASA) ne'ebé mak selebra iha loron 22 fulan-dezembru tinan 2020. (*)