Tempotimor (Dili)-Ministru Obras Públikas (MOP), Abel Pires da Silva, ho Reprezentante UN Women iha Timor-Leste, Nishtha Satyam, hodi ko’alia liu kona-ba programa UN Women nian ne’ebé sei hala’o iha Timor-Leste, liga ba partisipasaun feto iha servisu obras públikas no garante direitu feto iha área edukasaun no utilizasaun transporte públiku sira.

Tuir informasaun ne’ebé www.tempotimor.com asesu iha pájina MOP, sesta (24/06) katak,  UN Women konsidera presiza halo sensebilizasaun ka edukasaun públiku ida hodi konsiensializa ema hotu kona-ba partisipasaun feto no direitu feto nian iha espasu públiku sira.

Ministru Abel hato’o kona-ba polítika Ministériu Obras Públikas nian kona-ba partisipasaune feto iha atividade hotu inklui asume gargu xefia sira iha ministériu.

Aliende ne’e, iha Gabinete Ministru mós fó espasu ba feto na’in-rua husi organizasaun defisiénsia hala’o servisu iha Gabinete hanesan meus ida katak ministériu fó prioridade ba partisipasaun feto hotu iha servisu obras públikas nian.

Ministru mós orienta ona atu konstrusaun ba edifísiu públiku hotu akomoda mós nesesidade ba ema ho deifisiénsia hodi asesu.

Iha enkontru dahuluk ne’e Reprezentante UN Women iha Timor-Leste, Nishtha Satyam, (indiana) entrega mós prezente husi Índia ba Ministru Obra Públika, Abel Pires, iha salaun Gabinete Mop, Kaikoli, kinta (23/06). (*)