“Ami-nia objetivu ohin (22/06), mai enkontru ho Komisaun F ne’e atu haree liliu liga ba orsamentu 2023 nian oinsá mak orsamentu ida-ne’e ba Ministériu Solidariedade Sosiál no Inkluzaun(MSSI) ne’ebé mak apoiu ba institusaun defisiénsia sira, orfatnatu, uma mahon sira atubele haree liu ba orsamentu sensivel atu nune'e ONG defisiénsia sira bele hala’o sira-nia atividade hanesan baibain”, dehan Diretór Interinu Asosiasaun Halibur Defisiénsia Matan Timor Leste, Gabriel de Sousa, iha PN, kuarta (22/06).

Iha Tinan 2022 ne’e haree orsamentu ninia montante ba diresaun ne’e kiik, tanba ne’e ladún sensivel ba Organizasaun Naun Governamentál defisiénsia sira.

“Iha tinan ida-ne’e ita haree ba diresaun ne’ebé tutela ba Ministeriu Solidariedade Sosiál Inklizaun (MSSI) nia okos ho orsamentu $100 de’it kobre ba ONG 29 ne’e la sufisiente, tinan ida-ne’e la sufisiente tanba atividade hothotu sira koa tiha ami hatama proposta liga ho ami-nia atividade responde ba nesesidade membru liliu ba difisiensia matan ninian ne’e mós sira koa tiha no hasai hotu”, hatete nia.

Tanba ne’e, halo audénsia ho deputadu sira iha Komisaun F hanesan reprezenta povu, Ema Ho defisiénsia hato'o preokupasaun atubele haree liu ba orsamentu tinan 2023 nian.

“Ami-nia proposta hatama iha ne'eba kuaze $90.000 sira koa ami hetan de'it $40.000 ida-ne’e la responde ba atividades no asrama feto mane no ami-nia membru sira mós hasai hotu ida-ne’e mak la sufisiente ba ami”, esplika nia.

Maibé haree ba organizasaun defisiénsia ninian liliu ba defisiénsia ho matan nia organizasaun ADMTL iha ona atividade ne'ebé presiza atu hala’o

Tanba iha atividade kuaze 6 (neen) ne'ebé mak importante ba hanesan formasaun ba ema ho defisiénsia matan nomós programa rekolla dadus ba ema defisiénsia no advokasia ba atividade iha nível komunitáriu nomós nível alto sira.

Maske formasaun nafatin la’o maibé la responde ida-ne’e, ezemplu rekruta ema atu fó formasaun ba sira hasai tiha hotu.

“Ami-nia ema sira ne'ebé mak fó formasaun la’o voluntariamente durante 2017 mai to’o agora ami-nia treinadór sira fó formasaun ba ema ho defisiénsia la’o voluntariamente to’o agora”, informa nia.

Ba kestaun ne’e Komisaun F resposta ba futuru sira sei haree, bainhira audiénsia ho Ministériu Solidariedade Sosiál Inklizaun (MSSI) sira sei haree nomós iha tempu besik sira sei halo diskusaun kona-ba ratifikasaun dekretu lei ba ema defisiénsia.

Tanba ne’e, sei haree liu kona-ba Konsellu Nasionál direitu ba ema ho defisiénsia nomós sira sei haree kona-ba ida-ne’e.

AHDMTL nafatin halo audiénsia karik la hetan resposta sei hato’o ba nafatin Prezidente Repúblika atubele haree, tanba Prezidente Repúblika mak hanesan aman ba nasaun ne’ebé tenke haree didi’ak asuntu refere.

“Ami-nia audiénsia nafatin ba ministériu laiha solusaun no parlamentu laiha solusaun ami nafatin husu ba Prezidente Republika (PR) karik ida-ne’e mak sira la tau orsamentu ne'ebé mak sensivel ami husu ba prezidente ida agora nia haree liuba inklizaun sosiál no igualdade jeneru liliu kona-ba asuntu sira hanesan ne’e ami husu para prezidente presiza haree didi’ak asuntu ida-ne’e la inklui ita husu atubele veta, hadia fali orsamentu sira hanesan ne’e”, dehan nia. (*)