Tuir informasaun ne’ebé www.trmpotimor.com asesu iha pájina Ministériu Finansas, domingu (19/06) katak, iha asina akordu ne’e hetan akompaña husi Ministru Finansas, Rui Augusto Gomes no Vise MF, António Freitas iha Salaun City 8, Maleuana, sesta (17/06).

Ministru Rui Gomes iha nia diskursu Abertura iha Konferénsia Nasionál Janela Úniku Eletróniku no serimónia asinatura Protokolu Kooperasaun entre Autoridade Aduaneira no Diresaun Nasionál Transporte Terrestres hatete, Timor-Leste labele kontinua depende ba Fundu Petrolíferu, liliu ba longu-prazu. Deklina fiskál sei sai realidade iha tinan sanulu oin mai.

Timor-Leste dezenvolve fonte reseita alternativu sira seluk, tanba tempu to’o ona atu hahú diversifika produsaun, hari’i ekonomia ida ne’ebé mak mais reziliente no sustentavel, hodi hasoru xoke sira interna no esterna, hanesan pandemia no dezastre naturál.

Ministériu Finansas (MF), Rui Augusto Gomes hatete, daudaun ne’e, implementa reforma Fiskál no Jestaun Finansas Públikas-polítika reforma ida ne’ebé mak inísia ona iha tinan 2015 husi Sestu Governu Konstitusionál ne’ebé lidera husi Primeiru Ministru, Rui Maria de Araújo.

Haree ba importansia husi polítika ida-ne’e, Governu Konstitusionál daualu komprometidu atu kontinua implementa ajenda reforma ida-ne’e.

Nune’e iha tinan2021, hamutuk ho Ministériu Koordenadór Asuntu Ekonómiku, Diresaun Jerál Komérsiu, MTKI, SAMES, E.P., APORTIL, I.P. no Kuarantina, lansa ona Janela Úniku Nasionál, ASYCUDA World.

“Plataforma online ida-ne’e liga ita-nia Autoridade Aduaneira ho liña ministériu, ajénsia autónoma no institutu públiku sira ne’ebé mak trata movimentu ema, sasán no servisu sira”, afirma Ministru Rui.

Ho sistema koneksaun ne’ebé mak aplika iha servisus administrasaun públiku, Ministru fiar, sei redus atrazu, redus kustu tranzasaun, inklui tempu libertasaun sasán iha fronteira terrestres, portu no aeroportu.

Ba sistema koneksaun ne’e mós sei ajuda Autoridade Aduaneira atu kolekta reseitas ho maneira ida ne’ebé justu no transparente. Servisus hirak ne’e sei sai relevante liután hahú husi fulan-novembru ba oin bainhira Portu Tibar hahú nia operasaun.

“Ha’u apresia liña ministériu, ajénsia autónoma no institutu públiku sira ne’ebé mak implementa ona programa ida-ne’e, no ha’u enkoraja liña ministériu relevante sira seluk atu ativamente kolabora, engaja hodi aselera implementa sistema ne’e iha ita-boot sira-nia servisu fatin”, dehan nia.

(*)