“Tuir ha’u-nia haree no hatene momoos katak, estrada husi parte diresaun Maliana mai Kailaku araska tebetebes tanba komunidade barak mak la asesu ba merkadória ne’e maibé kondisaun estrada iha tempu ida-ne’e sira labele liu, ne’e ha’u bele hatete la ajuda liu”, dehan nia ba www.tempotimor.com iha Salaun Administrasaun Postu Kailaku, sábadu (18/06)

Tanba ne’e, produtu lokál ne’ebé mak iha suku laran produz mak haree, batar, no seluk maibé labele asesu ba merkadu ho kondisaun estrada ne’ebé at.

“Iha ami-nia produtu lokál ne'e barak liu mak haree, ne'e primeiru, no segundu batar no seluk tan, dala barak atu lori ba munisípiu ne’ebá araska tanba estrada”, afirma nia.

Bainhira komunidade sira ne’ebé mak aluga karreta atu lori sira-nia produtu sira ba Maliana tanba kondisaun estrada la di’ak nune’e sira husu folin atu tula sasán ba ho Montante ne’ebé boot.

Dalaruma mós komunidade sira ne’ebé mak iha karreta mak mai hola fós no produtu seluk maibé oituan tuir sira-nia nesesidade. (*)