Tuir informasaun ne’ebé www.trmpotimor.com asesu iha pájina MOP, sábadu (18/06) katak, reuniaun ne’ebé lidera husi Prezidente KAFI Interinu, atuál Ministru Finansas (MF), Rui Augusto Gomes, hamutuk ho ekipa sira halo diskusaun iha salaun Ministériu Finansas, kinta (16/06).
Reuniaun ne'e, KAFI kontinua halo konsultansaun ho supervizór ba konstrusaun estrada Laga-Baguia no Uaiaka-Kelikai-Ossu kona-ba nia progresu.
Tanba Projetu Laga-Baguia ho nia distánsia hamutuk Kilómetru 38.03, ho valór orsamentu $1.096.480.00 no Uaiaka-Kelikai-Ossu ho distánsia hamutuk Kilómetru 22.70km $523. 950.00.
Iha konsultasaun ba supervisaun konstrusaun ba projetu rua ne'e KAFI mós halo pedidu ba orsamentu supervisaun ho montante hamutuk $1.620.430.00.
Ministru Obras Públikas, Abel Pires hato’o preokupasaun ba membru KAFI kona-ba estrada foun Kasnafar to'o Sarlala, inklui preokupasaun kona-ba ponte ba mota Kasnafar tanba mota ne'e sai preokupasaun ba publiku, liliu komunidade munisípiu Aileu, Ainaro, Covalima no Munisípiu Manufahi tanba mota refere ameasa vida umanu iha tempu udan monu rai.
Enkontru KAFI ne'e partisipa mós husi Ministru Transporte no Komunikasaun (MTK), José Agustinho, Ministru Planu no Ordenamentu Internu atuál Ministru Administrasaun Estatal (MAE), Miguel de Carvalho, Reprezentante Ajensia Dezenvolvimentu Nasionál (ADN) Diretóra Nasionál Aprovizionamentu, Maria odete Freitas, Diretór Jerál Obras Públikas (DJOP), Rui Hernani, Diretór Nasionál Estrada, Ponte no Kontrolu i Seias (DNEPCC), Milton Ramanata de Castro Monteiro, Unidade Manajementu Projetu (UMP), Diogo Pereira, no ekípa tékniku sira husi ministériu relevante. (*)
