Tuir informasaun ne’ebé www.tempotimor.com asesu iha pájina Ministériu Finansas, kuarta (15/06) katak,  hahú iha loron 14 to’o 23 juñu, ekipa Misaun Artigu IV, FMI sei halo diskusaun ho liña ministériu relevantes no Ajénsia Autonómu sira kona-ba situasaun atuál ekonomia Timor-Leste no dezafiu sira ne’ebé mak país ne’e enfrenta.

Tanba vizita semana ida-ne’e hanesan oportunidade ida ba ekipa Misaun Artigu IV, FMI atu halo konsultasaun no diskusaun ho liña ministériu relevantes hanesan Ministériu Koordenadór Asuntu Ekonómiku, Ministériu Agrikultura no Peskas, Ministériu Turizmu, Komérsiu no Indústria, Ministériu Petróleu no Minerál, Sekretáriu Estadu Ambiente, Banku Sentrál, BNCTL, TradeInvest Timor-Leste, SERVE, Komisaun Anti-Korupsaun, Timor Gap, Parseirus Dezenvolvimentu, reprezentante setór privadu no organizasaun sosiedade sivíl atu fó sira-nia avaliasaun kona-ba Timor-Leste ninia dezenvolvimentu sosiál no ekonómiku.

Ho vizita ne’e mós hanesan oportunidade ida ba Governu liuhusi Ministériu Finansas atu husu Ekipa FMI nia opiniaun kona-ba situasaun ekonómiku atuál.

Iha vizita ne’e nia rohan, Ekipa FMI mós sei aprezenta Konkluzaun Prelimináriu husi sira-nia vizita ne’e ba Ministru Finansas, Rui Gomes, tanba informasaun ne’e sei serve hanesan referénsia ida ba Governu liuhusi Ministeriu Finansas iha faze elaborasaun OJE 2023.

Tanba ne’e hanesan ezersísiu importante ida ne’ebé mak daudaun ne’e Ministériu Finansas hahú halo ona.

Hafoin halo vizita, Ekipa FMI mós sei públika relatóriu ida ne'ebé koñesidu ho naran Relatóriu Artigu IV, FMI iha fulan-setembru 2022.

Iha reuniaun ne’e, Ministru Rui Gomes hetan akomapaña husi Xefe Gabinete Interinu, Acácio Pinto, Diretór Jerál Planeamentu no Orsamentu, José Alexandre de Carvalho, Diretór Nasionál Polítika Ekonómiku, Epifanio Martins no Asesór Polítika Laborál, Leoneto Elizario. (*)