Tuir informasaun ne’ebé www.tempotimor.com asesu iha pájina MOP, kuarta (15/06) katak, Ministru Abel Pires da Silva, iha segunda (13/06) akompaña husi ekipa Unidade Maneja Projeitu (PMU), lidera husi, Diogo A.Perreira, halo inspesaun ba projetu konstrusaun estrada nasionál husi munisípiu Baukau ba munisípiu Vikeke.
Iha inspesaun servisu ne'e Ministru Abel orienta kompaña CRIG-COVEC atu aselera lalais obra refere tanba lansamentu fatuk dahuluk ba konstrusaun hala’o iha loron 09 fulan-Agostu tinan 2019, maibé to'o óras ne'e seidauk finaliza, liliu Lot 2 husi projetu ne'e la'o tarde oituan
Entertantu projetu estrada nasionál trosu Baukau-Venilale no Venilale-Vikeké ne'e kontrui husi kompaña Internasionál CRIG-COVEC ho distánsia kilometru 58-resin, ho orsamentu millaun $44, fundu impréstimu husi Banku Dezenvolvimentu Aziátiku (ADB).
Projetu estrada ne'e iha Lot 2, Lot 1 mak husi Baukau to'o Venilale no Lot 2 mak husi Venilale to'o Vikeké. Ba konstrusaun estrada nasionál Baukau-Venilale Lot 1 ne'ébé atinje ona pursentu 57,91 ba fiziku konstrusaun. Maibé husi Baukau to'o Vikeké lot 2 ne'ébé atinje ona pursentu 43.53% ba fíziku konstrusaun. (*)
