Tuir informasaun ne’ebé www.tempotimor.com asesu iha pájina MOP, sábadu (11/06) katak, Ministru Abel Pires da Silva, akompaña husi Vise Ministru MOP, Nicolau Lino Freitas Belo, liuhusi enkontru konsellu konsultivu informa kona-ba atribuisaun kompeténsia ba IJE.IP hodi normaliza estrada no ponte, normaliza mós irigasaun ba natar sira.

Enkontru ne’ebé hala’o iha Gabinete MOP, Kaikoli, Dili, Ministru Abel hatete, ministériu iha obrigasaun atu tau-matan ba funsionáriu liliu tékniku sira iha IJP.IP hodi insentiva di’ak liután tékniku sira ba servisu atendimentu públiku liliu estrada, ponte, mota inklui kompeténsia foun kona-ba normalizasaun irigasaun sira, tanbe ne’e presiza buka dalan oinsá tau-matan ba nesesidade tékniku sira-nian.

Prezidente IJE.IP, Hermenegilda da Costa Laurenta, defende katak durante ne’e tékniku sira iha tereñu halo servisu maka’as loron no kalan maibé saláriu kontinua hanesan ho funsionáriu baibain, tanba ne’e, presiza iha insentivu hodi hodi insentiva tékniku sira servisu di’ak liután.

Iha enkontru ne’e partisipa husi membru Konsellu Konsultivu Ministériu Obras Públikas nian hanesan Diretór Jerál Administrasaun no Finansas (DJAF), Januário A. Barbosa, Diretór Jerál Obras Públikas (DJOP), Rui Hernani, Diretór Jerál Habitasaun no Urbanízmu (DJHU), Roger Tertuliano Belo, Unidade Apoiu Jurídiku MOP nian, Prezidente IJE.IP rasik ho vogál sira. (*)