Print this page

MOP Kontinua Esforsu Nahe Asphalt ba Estrada Kasnafar-Sarlala

Ministru Obras Públikas (MOP), Abel Pires da Silva. Ministru Obras Públikas (MOP), Abel Pires da Silva. Foto Suplay

Tempotimor (Dili)-Ministru Obras Públikas (MOP), Abel Pires da Silva hatete, dadaun ne’e MOP kontinua halo esforsu hodi bele nahe Asphalt ba estrada nasionál ligasaun Kasnafar to’o Sarlala Munisípiu Aileu.

Tuir informasaun ne’ebé www.tempotimor.com asesu iha pájina Ministériu Finansas, sábadu (11/06) katak, Ministru Abel esplika, daudauk ne’e tékniku sira MOP nian kontinua halo verifikasaun para tau Asphalt maibé ho razaun estan estragu iha 4 Abril 2021, entaun tékniku sira verifika uluk pakote ida husi Sarlala tuun mai to’o Air Terjun hodi tau Asphalt, iha tempu badak sei haruka ba Ajénsia Dezenvolvimentu Nasionál (ADN) hodi halo verifikasaun.

“Agora, foin ita iha faze normalizasaun, asesu di’ak ona, bele, maibé ne’e la to’o, daudauk ne’e iha faze verifikasaun dadus tanba tuir loloos iha maiu ne’e ami haruka ona ba ADN, verifikasaun para ita tau Asphalt, mais tanba razaun ida ohin ita-boot sira temi dehan akontese estragu entaun ita tenke update fali dezeñu ne’e, update dezeñu ne’e mak pakote ida leten sa’e ba Sarlala nian ne’e, ne’e hotu ona, husi Sarlala tuun mai air terjun ne’e semana ne’e hotu, entaun semana oin bele haruka ona ba ADN halo verifikasaun, mais pakote rua tuun mai ne’e mak sei han tempu oituan para oinsá iha inísiu Jullu ne’e bele ba ona ADN halo verifikasaun e importante mak ne’e antes udan mai ita-nia esforsu halo ona reabilitasaun, balun konstrusaun mais reabilitasaun tau Asphalt”, esplika Abel ba jornalista sira iha Palásiu Governu, kuarta (08/06).

Kona-ba orsamentu ba konstrusaun nian, Ministru Abel hatete, ba estrada refere orsamentu husi Fundu Infraestrutura ne’ebé laiha problema kona-ba osan, Fundu Infraestrutura kobre hotu despeza ba estrada pakote ida-ne’e.

Aliende ne’e kona-ba estrada monu iha JL Vila oin, Fatuhada nian daudauk ne’e iha ona prosesu konkursu públiku, no la kleur taka sai, tanba ne’e iha fulan-ida rua nia laran bele hadi’ak ona.

Kona-ba kondisaun estrada urbana husi Bairropité to’o Ailok-Laran ne’ebé daudauk ne’e kondisaun kontinua at, prosesu kleur oituan, tanba estragu ne’e barak, ho orsamentu pruvola millaun $300.

“Entaun ita la halo milagre, la’ós iha kalan ida de’it ita bele rezolve hotu, importante mak ministériu agora daudauk ne’e esforsu hela atu hadi’a, hothotu tama iha esforsu maibé tanba barak loos, projetu husi ki’ik oan to’o millaun $20 resin entaun ita presiza tempu oituan atu hadi’a, mais importante mak esforsu ne’e nafatin”, dehan nia.

Hanesan Ministru Obras Públikas kontinua orienta tékniku sira halo koordenasaun entre tékniku interministeriál ba implementasaun projetu infraestrutura sira.

Tékniku sira mós atualiza progresu servisu semanalmente, aprezenta rezultadu no problema sira ne’ebé iha hodi fó solusaun. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items