Tuir informasaun ne’ebé www.tempotimor.com asesu iha pájina MOP, kuarta (08/06) katak, hafoin votasaun ba akordu ne’e, Prezidente Parlamentu Nasonál (PN), Aniceto Longuinhos Guterres Lopes, anunsia katak akordu ne’e Parlamentu Nasionál aprova ona no ratifika ho votu afavór 49, kontra 0 no abstensaun 0.

Iha diskusaun, ba akordu ne’e, Ministru Abel Pires hatete, akordu kona-ba servisu áero ne’e importante, fó espasu ba Timor-Leste hodi asesu ba internasionál.

Tanba liuhusi akordu ne’e nasaun rua bele asesu ba malu, no Timor-Leste mak sei hetan oportunidade barak liu tanba bele iha espasu hodi asesu direita ba Árabe, bele liuhusi aviaun Árabe nian Emirete ne’ebé serví ka semo ba nasaun barak.

Bainhira iha ona ligasaun direita mak vizitante husi nasaun seluk bele liuhusi Timor-Leste tanba odamatan iha ona.

Akordu ne’e fó importánsia ba servisu áero nian no sai xave mós ba setór turízmu, inklui oportunidade ba empreza nasionál bele asesu ba merkadu.

Governu Timor-Leste mós daudauk ne’e esforsu hodi dezenvolve di’ak liután infraestrutura Aeroportu Internasionál Prezidente Nicolau Lobato ho apoiu husi Governu Japaun, espera bele hadi’a iha tempu badak hodi fasilita movimentu aviaun nian.

Ikus liu, atuál Ministru Obras Públikas ne’e lori Governu nia naran agradese ba Parlamentu Nasionál ne’ebé aprova ona akordu ne’e, no ho ratifikasaun ne’e.

Nune’e Ministru Transporte no Komunikasaun mós sei ba nasaun Qatar hodi halo selebrasaun ba akordu hanesan no sei lori fali mai Parlamentu Nasionál hodi halo ratifikasaun. (*)