Tuir informasaun ne’ebé www.tempotimor.com asesu iha pájina MOP segunga (06/06) katak, Ministru Obras Públikas (MOP), Abel Ministru agradese tebes tanba projetu reabilitasaun sistema bee-moos iha aldeia Dakolo, Suku Nanu bele fasilita ona inan-aman no labarik sira la la’o dook ona mak kuru bee, tanba ne’e agradese ba parte hotu ne’ebé kontribui realizasaun projetu ne’e, inklui Ministru Obras Públikas sesante, Salvador Eugénsio Soares dos Reis Pires.

“Ami ne’e mai inaugura de’it, obra ne’e, servisu maka’as loos ne’e ita-nia Prezidente (BTL.EP) ne’e, ne’ebé agradese ba Prezidente. Ha’u mai iha ne’e foin mak dalarua, mais kontente ohin mai ne’e halo buat foun inaugura bee-moos ba ha’u-nia inan-aman sira iha ne’e, ne’ebé parabéns ba ha’u-nia inan-aman sira, esforsu ida-ne’e esforsu ida ke kleur, entaun ema ne’ebé merese hetan agradese mós mak ita-nia ministru sesante”, dehan Abel Pires hafoin inaugural Projetu Bee-moos refere.

Tanba esforsu husi momentu ne’eba mak ohin loron halo inaugurasaun, mais parabéns liliu ba oan sira, inan-aman sira, parese kala inan-aman sira la haruka ona sira ba kuru iha fatin dook.

“Ha’u uluk moris iha Fatululik iha tempu funu ha’u hatene rasik kuru bee husi dook ne’e oinsá, ami ba kuru bee to’o Mataair mak sa’e fali ba, ami ba Karau kota Karau ulun mak sa’e fali mai, ne’ebé kontente loos ho ha’u-nia oan sira iha ne’e tanba lala’o dook ona komesa ohin ba oin, Maromak tulun labele estraga sasán sira ne’e para ita-nia oan sira ne’e konsentra de’it ba halimar ho estuda, fasilidade ida-ne’e ba sira duni”, afirma Ministru Abel.

Nune’e husu komunidade atu kuidadu sistema bee-moos atubele dura to’o tempu naruk tanba konstrusaun ba projetu bee-moos ne’e lori tempu naruk maibé atu estraga bele lori de’it loron ida estrada ona.

Hanesan oan husi Eis Administradór Covalima, Inácio Pires da Silva, Ministru hakarak kontinua obra ne’ebé husik hela mak kona-ba estrada husi Tilomar to’o Fatumea no eletrisidade ba suku sira ne’ebé liga direita ba komunidade nia moris.

“Ha’u mós hakarak atu hato’o ba ha’u-nia inan-aman sira iha ne’e, ohin mai hanesan Ministru Obras Públikas sente la kompletu tanba ita foin mak inaugura bee, hein katak sei mai tan dala ida ita inaugura eletrisidade, see Maromak tulun ita sei mai tan tinan ida ka rua ita inaugura estrada, ne’e kompromisu pesoál, ha’u-nia aman mós uluk mai iha ne’e ko’alia ona nia la konsege, entaun todan ne’e mai hotu ha’u”, hatete nia.

Ministru Obras Públikas hanesan Suai oan no ema rezisténsia iha razaun barak atu rezolve problema bee, problema ahi no problema estrada iha reziaun ida-ne’e, la’os de’it ne’e, ohin hamutuk Sekretáriu Estadu ko’alia razaun barak, razaun ida mak ne’e, inan-aman sira moris iha ne’e labele sente inferiór kompara ho maluk sira iha mota sorin (NTT, Indonézia nian) labele, tanba nasaun ketak, bandera ketak, história ketak, mais atu to’o iha ne’eba Governu sentrál tenke rezolve ida-ne’e.

“Ohin ha’u labele promete tanba kuandu ha’u promete ha’u tenke halo, ha’u bele promete katak ita prepara kondisaun atu halo estrada ida-ne’e”, haktenik nia.

Ministru hato’o mós komprimentus husi Primeiru Ministru (PM), Jenerál Taur Matan Ruak, nian ba komunidade Suku Nanu, no komunidade Postu Administrativu Fatumea ein jerál, iha Governu Konstitusionál daualu ne’ebé lidera husi Primeiru Ministru (PM), Jenerál Taur Matan Ruak, sei halo esforsu hodi rezolve uluk eletrisidade, estrada mak sei han tempu oitun maibé dezeñu sei rezolve tinan ida-ne’e nia-laran.

Iha inetervensaun hanesan Kovalima ona, Ministru konta mós história kona-ba aldeia Dakolo, Suku Nanu, liliu Postu Administrativu Fatumea ein jerál iha prosesu luta ba libertasaun nasionál.

Sekretáriu Estadu Ambiente, Demétrio do Amarál de Carvalho, afirma ho lansamentu projetu bee-moos ne'e iha tempu badak SEA mós sei realiza programa tara bandu iha suku refere hodi proteze aihoris sira, tenke kuda ai, no labele sunu duut sira.

Husu ba komunidade la kuda ai karik pelumenus tenke labele sunu duut, no ai-horis sira, atu nune'e kontinua proteje bee-matan sira.

Administradór Postu Administrativu Fatumea, Geraldo Orleans, reprezenta administradór Munisípiu Covalima agradese ba Governu no kompañia ne'ebé kaer projetu bee-moos refere.

Husu mós ba komunidade atu kuidadu nafatin kanalizasaun bee-moos ne'e bele uza ba tempu naruk, liliu inan-feton no labarik sira bele uza,

durante ne'e komunidade liliu inan-feton no labarik sira sempre kuru bee-moos iha mota laran, la'o kuaze oras ba oras para kuru bee-moos uza ba nesesidade loroloron nian, maibé ho projetu bee-moos ne'e sei tulun komunidade la la'o dook tan mak kuru bee-moos.

Iha mós lamentasaun ne’ebé mosu tanba tuir informasaun katak kanalizasaun ne'e seidauk inaugura maibé kanu balun hahú hetan ona estragu husi ema deskoñesidu, tanba ne'e nia husu atu komunidade sira ne'ebé hetan ona asesu bee-moos no komunidade viziñu balun ne'ebé seidauk hetan asesu bee-moos atu kolabora nafatin, kuidadu kualker projetu ne'ebé eziste iha postu Fatumea.

Xefe Suku Nanu, Arcelino da Cruz, lori komunidade Suku Nanu nia naran agradese ba VIII Governu Konstitusionál tanba bele responde preokupasaun komunidade nian kona-ba bee-moos ne'ebé durante tinan barak komunidade halerik.

“Ha'u lori komunidade tomak agradese ba VIII Governu Konstitusionál ho prezensa membru Governu nian ami bele sente ona mudansa ba dezenvolvimentu, bele kore ona ami-nia terus no susar iha tinan barak”, agradese Xefe Suku.

Diretora Kompaña Karisan Bonansa, Lidia José de Araujo Nunes, informa katak tenderizasaun ba projetu reabilitasaun sistema bee-moos ne’e kompaña manán iha tinan 2019 ho durasaun fulan-6 maibé la konsege finaliza tuir kontratu tanba pandémia Covid-19 no kontinua estensaun to’o Outubru 2020 mak finaliza.

“Projetu ne’e tender husi Ministériu Obras Públikas iha 2019 no hahú servisu iha fulan-dezembru 2019 to’o 31 maiu 2020 maibé ita enfrenta tiha pandénsia Covid-19 entaun hadi’a tiha to’o fulan-outubru 2020, projetu ne’e nia totál osan 165, 277,57, durasaun servisu maka fulan-neen. Projetu ida-ne’e reabilitasaun ba tanki 3 ho konstrusaun foun ba tanki 10, ho distánsia kilometru 5 resin”, esplika Lidia.

Iha ne’e, komunidade mós hato'o preokupasaun kona-ba bee-moos, eletrisidade liliu estrada ne'ebé defikulta tebes komunidade, iha tempu udan difísil asesu ba merkadu.

Serimónia inaugurasaun ne’e partisipa husi autoridade Postu Administrativu Fatumea, reprezentante Komandu Polísia Nasionál Timor-Leste (PNTL) Munisípiu Covalima nian, Unidade Polísia Fronteira (UPF), Veteranu, autoridade lokál no komunidade sira iha suku refere. (*)