Durante diskusaun, Deputadu sira aprezenta proposta alterasaun no aditamentu barak ba proposta lei GOP refere, ne’ebé balun aprova no balun la konsegue aprova.

Grandes Opções do Plano 2023 kontein medida ka atividade prinsipál hamutuk 263 liuhusi programas 45 iha área estratéjiku 16 ne’ebé Governu sei foku iha tinan oin.

Proposta Lei GOP mós inklui estimasaun orsamentu multi anuál hahú husi 2023 to’o 2027 nomós tetu agregadu ba OJE 2023 ho montante billaun $3,15 ne’ebé sei aloka ba Administrasaun Sentrál billaun $2,8, RAEOA millaun $120 no Seguransa Sosiál millaun $235,7.

Montante billaun $3,15 ne’e inklui ona Fundu Kombatente Libertasaun Nasionál ho montante billaun $1.

Iha Proposta Lei das Grandes Opções do Plano ne’e, Ministériu Finansas mós aprezenta senáriu makroekonómiku ne’ebé prevé katak PIB la’ós-Petrolíferu iha tinan 2022 sei krese ba 2,9% no 3,1% iha tinan 2023 ho inflasaun 6,7% iha tinan ida-ne’e.

Antes ne’e, Ministériu Finansas mós realiza ona Jornada Planeamentu iha ne’ebé Membrus Governu no responsável Entidades Estadu hamutuk 98 halo ona apresiasaun ba medidas ka atividade prinsipál iha Grandes Opções do Plano ba 2023.

Medida tuir proposta inísiu husi Entidades Estadu hamutuk rihun-haat-resin. Ministériu Finansas halo rasionalizasaun tun ba 1.452 no iha Proposta Lei GOP tun ba 263 medidas liuhusi Programas 45, organiza iha área estratéjiku 16.

Lei númeru 2/2022, 10 fevereiru kona-ba Enkuadramentu Orsamentu Jerál Estadu no Jestaun Finanseira Públika mai altera prosesu orsamentál anuál ne’ebé antes nee prosesu orsamentál konsentra de'it iha aprovasaun Lei Orsamentu Jerál Estadu.

Ho aprovasaun finál globál ne’e, komisaun relevante sei halo redasaun final antes haruka ba Gabinete Prezidente Parlamentu Nasionál no haruka ba Prezidente Repúblika hodi promulga. (*)