Print this page

USAID Anunsia Atividade ho Kustu Millaun $10,2 Haforsa Sistema Komérsiu iha Timor-Leste

Diretora Missaun USAID iha Timor-Leste, Zema Semunegus Diretora Missaun USAID iha Timor-Leste, Zema Semunegus Foto Suplay

Tempotimor (Dili)-Estadus Unidus Amerika liuhusi Ajénsia Estadus Unidus ba Dezenvolvimentu Internasionál (USAID) no Ministériu Finansas (MF) anúnsia atividade foun ba tinan tolu ho kustu millaun $10,2 hodi ajuda institusionaliza sistema komérsiu iha Timor-Leste.

Tuir informasaun ne’ebé www.tempotimor.com asesu iha pájina Ministériu Finansas, sesta (03/06) katak, atividade ne’e ajuda Governu Timor-Leste institusionaliza sistema komérsiu ne’ebé Governa ho di'ak no modernu, professionál, transparante, responsavel, efisiente, efikaz, no responde ba Timoroan, no kompatível ho padraun internasionál sira.

Ba atividade ida-ne’e sei impulsiona komérsiu no kresimentu ekonomia, hasa’e Governu nia reseita, hasa’e integrasaun rejionál no internasionál, nomós haforsa boa governasaun.

“Estadus Unidus komprometidu hodi kontinua apoiu Timor-Leste iha implementasaun sistema komérsiu ne’ebé governa ho diak no modernu,” hatete Diretora Missaun USAID, Zema Semunegus, kinta (02/05).

Tanba USAID valoriza kooperasaun no kolaborasaun ne’ebé di'ak tebes ho Ministériu Finansas no Autoridade Aduaneira, inklui liuhusi USAID nia Projetu Reforma Aduaneira ne’ebé foin remata daudaun, ne’ebé rezulta poupansa ho estimadamente millaun $38 ba empreza Timor nian liuhusi aumenta iha efisiensia.

“Ami espera atu kontinua servisu ho Timor-Leste ne’ebé agora esforsu hela atu halo reforma doméstika sira ne’ebé nesesária hodi aliña totalmente ninia rejime komersiál ho regra Organizasaun Mundiál ba Komérsiu no liberaliza ninia komérsiu”, afirma nia.

Tuir pedidu Governu Timor-Leste nian, USAID sei servisu hamutuk ho Ministériu Finansas, Autoriade Aduaneira, no ajénsia Governu sira seluk, nomos ho setór privadu, hodi hadi’ak governasaun komérsiu, fasilitasaun komérsiu, no prosesu sira alfandega nian.

Governu Estadus Unidus fornese millaun $10,2 liuhusi USAID iha Timor-Leste nia atividade Governasaun Komérsiu hodi apoiu Autoridade Aduaneira Timor-Leste nian no ajénsia Governu sira seluk ne’ebé mak liga ho komérsiu.

Ministru Finansas S.E. Rui Augusto Gomes hatete, lansamentu USAID nia Atividade Governasaun Komérsiu foun ne’e marka pasu importante ida tan ba Autoridade Aduaneira.

“Apoiu millaun $10,2 ida-ne’e hanesan apoiu siknifikante ida no esensiál hodi permiti ita-nia Autoridade Aduaneira iha ninia jornada atu sai organizasaun ida ne’ebé independente, konfiavel no efisiente, tau kliente nu’udar sentru iha ninia prestasaun servisu esensiál.

Tanba ne’e, agradese Estadu Unidus Amérika no Povu Amerikanu ba sira-nia apoiu ne’ebé firme, no prontu atu haklean liután parseria hodi alkanse Autoridade Aduaneria nia meta ba longu-prazu ne’ebé mak atu ‘halo komérsiu lailais liu, simples liu no justu liu’.

Ba apoiu ida-ne’e sei hadi’ak prosesu importasaun no esportasaun hodi funsiona tuir mellór pratika globál no padraun sira ne’ebé iha Organizasaun Alfandega Mundiál (WCO) ninia Estrutura Padraun hodi Proteje no Fasilita Komérsiu Globál, Revisaun Konvensaun Kyoto WCO nian, Revisaun Deklarasaun Arusha WCO nian, no Akordu Fasilitasaun Organizasaun Mundiál Komérsiu nian, no Rekizitu ba adesaun iha Asosiasaun Nasaun Sudeste Aziátiku nian. Programa ida ne’e ’e sei promove utilizasaun rekursu ne’ebé efisienti no efetivu liután no estabelese no jere estrutura adekuada ne’ebé sei fo komersiante nomós setór privadu sira lian hodi garante governu ida ne’ebé transparante no responsivu ba públiku.

Tanba International Business Initiatives, empreza ki'ik ne'ebé feto mak nu’udar na’in ho baze iha Estadus Unidus mak sei implementa atividade ne’e. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items