Diretór Kompaña Wetodu Unipesoal, Lda, Mario dos Reis Amaral, kompremete sei implementa projetu bee ba komunidade sira iha Soibada tuir kontratu ne'ebé mak iha.

“Ami kompaña prontu atu realiza projetu tuir tempu ne'ebé iha kontratu tau iha ne'ebá fulan 6, maibé karik iha mudansa ruma ami seidauk hatene”, dehan Mario dos Reis Amaral iha edifísiu BTL Kaikoli, sesta (03/06).

Projetu bee-moos ne’e kompaña garante instala bee-moos ba populasaun iha Postu Administrativu Soibada sei la’o di’ak.

“Ami husi kompaña garante duni atu instala bee-moos ba komunidad iha Soibada tuir dezenhu ka Bill of Quantity (BOQ) ne’ebé iha, ami sei priense no implementa tuir akordu kontratu sira ne'ebé kompaña ho BTL selebra”, afirma nia.

Iha fatin hanesan Administradór Postu Administrativa Soibada, Luis Gonzaga da Silva, agradese tebes ba Governu konstitusionál ualu tanba bele responde ona preokupasaun komunidade Postu Administrativu Soibada liuhusi implementa projetu bee-moos.

“Aproveita oportunidade ida nee agradese ba VIII Governu konstitusionál, tanba bele implementa projetu bee-moos ba ami povu Soibada tanba tinan barak ami halerik bee”, dehan nia.

Projetu bee-moos ne’e rasik sei uza orsamentu hamutuk ho totál hamutuk $772,944.46 ne'ebé mak ho nia durasaun tempu to’o fulan neen (6).

Konstrusaun sistema bee-moos ne’e, sei benefisia ba uma-ka’in 280 ho populasaun 1,680, iha suku haat, hanesan suku Samoro, Manlala, Leohaat no Fatumakerek, nomós ba fasilidade públika sira hanesan igreja, eskola, sentina públiku no edifísiu Postu Administrativu Soibada nian. (*)