Tuir informasaun ne’ebé www.tempotimor.com asesu iha pájina MTKI, sesta (03/06) katak, iha faze Semi-finál ba Kompetisaun ne’e halo ona selesaun ho rigourozu husi kandidatu Jovens Inovativu na’in-25 husi panelista tolu, ne’ebé kompostu husi MTKI, Embaixada Nova Zelándia no Instituto de Apoio ao Desenvolvimento Empresarial (IADE).

Ba rezultadu finál husi selesaun ne’ebé deside ona tuir kompozisaun valór husi ekipa juri, anúnsiu na’in-sanulu (10) mak passa ba faze finál.

Iha faze finál juventude husi grupu tolu mak liu iha sesaun ikus nian tanba sira ho ideia ne’ebé kreativu no inovativu liu iha kompitisaun refere.

Kompetisaun Inovativu ne'e, nia objetivu atu enkoraja joven emprendedorizmu sira hodi hamosu idea diferente, úniku no inovativu relasiona ho negósiu sosiál husi setór sira hanesan, agrikultura no peskas, turizmu, manufatureira, produsaun ai-hán, teknolojia nomós setór sira seluk ne’ebé iha valór ekonómiku aas hodi kontribui no solusiona problema iha komunidade no Promove Abilidade ba Futuru, Hari’i no Haforsa Empreza Foinsa’e Sira hodi Kontribui ba Dezenvolvimentu Sustentavel.

Nune’e, assegura soberania Ekonómia liuhusi aumenta produsaun lokál, kria oportunidade empregu no aumenta rendimentu família.

Ministru Turizmu Komérsiu no Indústria, (MTKI), José Lucas do Carmo da Silva hatete, Governu tau importansia tebes ba foinsa'e sira no eventu ne'e tanba foinsa'e sira mak futuru nasaun nian no ajente transformadór setór hothotu iha Nasaun ne'e.

“Governu mós nafatin haforsa no hariku juventude sira-nia talentu tuir Konstituisaun RDTL artigu 19”, dehan Ministru José Lucas.

Iha serimónia enseramentu ba kompitisaun ne'e akompaña mós husi Vise-Ministru Komérsiu no Indústria (V-MKI), Domingos Lopes Antunes, partisipa iha atividades refere, Prezidente CCI-TL Oscar Lima, CEO-BNCTL Brigidio de Sousa, Munkhtuya Altangerel, Lazima Okta, DN-AMPMES Bernadino Menezes, Rui Castro, nomós foinsa'e sira. (*)