Print this page

SEKOOP Inaugura Edifísiu no Lansamentu Kréditu CU Osgima

Sekretáriu Estadu Kooperativa (SEKOOP), Elizário Ferreira. Sekretáriu Estadu Kooperativa (SEKOOP), Elizário Ferreira. Foto Suplay

Tempotimor (Vikeké)-Sekretáriu Estadu Kooperativa (SEKOOP), Elizário Ferreira, ofisialmente inaugura edifísiu Kooperativa Kréditu Uniaun Ossu gi Mata (Osgima) no halo lansamentu primeira kréditu ba membru sira iha Suku Ossu de Sima, Postu Administrativu Ossu Munisípiu Vikeké, kinta (02/06).

Iha serimónia ne’e, Sekretáriu SEKOOP, Elizário Ferreira hatete, kooperativa iha era tinan 2000 mai leten ne'e hetan previlejiu tanba Organizasaun Naun Governamentál-Internationál sira apoiu sira ho uma no ekipamentu no materiál sira.

“Ha’u atu husu ba dirijente sira imi sorte di’ak hanesan kooperativa imi sorte di’ak tanba imi hari’i kooperativa ema mai ho uma ema mai ho materiál apoiu”, dehan Elizário Ferreira iha Edifisiu CU Osgima, Ossu de Sima, kinta (02/06).

Tanba ne’e, SEKOOP husu ba membru no dirijente kooperativa sira atu kuidadu apoiu sira ne’ebé mak ONG fó sira ba kooperativa sira.

Ba lideransa kooperativa iha tempu uluk ne'e difísil loos tanba laiha apoiu ruma husi ONG lokál no internasionál sira.

“Ami hahú ho kréditu Uniaun ne’e ema bolu hahú husi varanda lakleur muda ba kuarta no no ikus mai muda ba uma, ami hahú ne’e iha tenda mak atende atende malu”, informa nia.

Nune’e, husu nafatin ba dirijente sira hotu atu kontinua nafatin tuir formasaun sira ne’ebé mak ONG no parseiru dezenvolvimentu Nasionál no internasionál sira fó.

“Kooperasun sira ne’ebé barak liu o ONG-internasionál la husu osan ita husu formasaun sei apoiu formasaun apoiu formadór sira atubele halo formasaun tanba ida ne'e sai importante”, haktuir nia.

Ba edifísiu CU Osgima apoiu husi ONG-internasionál ADRA Timor-Leste hodi halo konstrusaun ikus mai hetan inaugurasaun.

Reprezentante Adventist Development and Relief Agency (ADRA) Timor-Leste husi Governu Nova Zelándia, Moises Pinto husu ba membru no Dirijente CU Osgima atu kuidadu apoiu konstrusaun ba edifisiu CU Osgima.

“Importante mak fasilidade ne’ebé mak iha ne'e ba ita boot sira liliu ba kooperativa no komunidade sira ne’ebé mak iha ne’e uza ho di’ak”, dehan nia.

Antes ne'e Adventist Development and Relief Agency (ADRA) Timor-Leste liuhusi Viqueque Sustainable Agro-Enterprise Farmers to Market (FarMar) Development Project asina ona akordu (MoU) ho Sekretáriu Estadu Kooperativa.

Husi akordu ne’e atu hahú servisu hamutuk entre SEKOOP, liliu Diresaun Nasionál Dezenvolvimento Setór Kooperativa no ADRA Timor-Leste liuhusi fasilita formasaun Báziku no Espesialidade Kooperativa ba grupu agrikultór sira ne’ebé hetan apoiu husi projetu FarMar iha tinan tolu (3) nia laran. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items