Tuir informaasaun ne’ebé www.temotimor.com asesu iha pájina Ministériu Finansas, kinta (02/06) katak, iha fulan-marsu 2019, IJGlobal anúnsia iha Singapura katak Portu Tibar nu’udar Mellór Projetu Parseria Públiku Privada iha rejiaun Ázia-Pasífiku iha tinan 2018.

Tanba ne’e, IJGlobal mak organizasaun finanseiru mundiál ne’ebé trata projetu infraestrutura sira iha nível internasionál.

Rekoñesimentu internasionál husi IJGlobal ne'e motiva Governu Konstitusionál daualu hodi diversifika liután investimentu estratéjiku sira iha área sira seluk ne’ebé liga ho kapitál umanu hanesan saúde no edukasaun hodi mellora kondisaun moris sidadaun nian nomós investimentu estratéjiku iha setór produtivu sira ne’ebé produs rikeza, bele hatama reseita ba Estadu no kria kampu traballu ba Timoroan sira.

Nune’e iha semana hirak liubá, Membru Komisaun Inter-Ministeriál hamutuk ho Diretór PMU Portu Tibar, Rui Soares, akompaña Primeiru-Ministru, Jenerál Taur Matan Ruak, iha serimónia lansamentu deskargamentu ekipamentus Sea-to-Shore no Rubber Tyred Gantry Cranes ne’ebé to’o ona iha Portu Tibar.

Ba instalasaun ba ekipamentus hirak ne’e hahú ona no sei ramata iha semana hirak tuir-mai.

Ekipamentu ba deskarga no karrega kontentór ne’e sei fasilita movimentu importasaun no esportasaun sasán sira, redus atrazu, kustu tranzasaun inklui tempu libertasaun kontentór.

Iha efisiénsia hirak ne'e sei ajuda Governu liuhusi Ministériu Finansas atu kolekta reseitas ho lailais, justu no transparente. (*)