Tuir informasaun ne'ebé www.tempotimor.com asesu iha segunda (30/05) katak, objetivu husi Feira ida ne’e mak atu motiva no halo promosaun produtu lokál membru  Kámara Komérsiu Indústria Timor-Leste (CCITL) sira-nian, liliu empreza boot, médiu no indústria ki’ik sira ne’ebé durante ne’e hala'o produsaun no kria kampu servisu ba Timoroan sira, nune’e mós kria servisu ba an rasik (Auto Emprego) hodi responde nesesidade merkadu iha rai laran no rai liur.

“Ha’u agradese feto emprezariál sira ne'ebé hatudu ona ita-boot sira-nia kreatividade liuhusi feira ida ne'e, ita prezisa servisu hamutuk hodi hadi’a ninia kulidade no kuantidade ne'ebé mak di’ak liután nomós tenke asegura ita produtu nia kualidade hodi nune'e oferese ba merkadu iha ninia sustentabilidade no kualidade”, afirma Elizário.

Iha ámbitu ne'e, Kámara Komérsiu Indústria Timor-Leste (CCITL), realiza Feira Feto Empreemdedorizmu 2022, hodi hatudu sira-nia kreavitidade iha feira ne'ebé hala'o durante loron rua nia laran, husi loron sesta to'o loron sábadu (27-28) fulan-máiu 2022, iha resintu edifísiu Akait, Dili.

Prezensai iha seremónia loke feira ne'e hanesan, Vise Prezidente Kámara Komérsiu no Indústria Timor-Leste (CCI-TL) ba Assuntu Edukasaun no Saúde, João C. Fernandes, Reprezentante Koordenador Assunto Ekonómico, Guida Monteiro, Reprezentante Embaxada Estadu Unidus Amerika nian ne’ebé iha Timor-Leste, no CEO BNCTL, Brigido de Sousa. (*)