Tuir notisia ne'ebé www.tempotimor.com asesu iha pájina Ofisiál Sekretária Estadu Kooperativa katak, SEKOOP husu ba fundador sira tenki garantia sustentabilidade Cooperativa nian hodi bele fó benefisia ba membru sira.
“Cooperativa Prospéro moris ona, no presiza la'o ba dook, tenke kumpri pontu hirak tuir mai, presiza iha mapa ida atu la'o tuir to'o rohan, Kooperativa presiza iha méritu, dirijente sira mak tenke sai kondutór ba membru sira, fundadór sira tenke simu responsabikidade hodi servisu ba sustentabilidade kooperativa nian”, hatete Elizário Ferreira ba dirijente Kooperativa iha Salaun Asosiasaun Emprezariál Muller Timor Leste (AEMTL) Akait Dili, segunda (30/05).
Ba dezafiu boot ne'ebé mak Kooperativa Prospéro sei hasoru mak ispíritu individualizmu sei domina tanba fundadór maioria ema emprezária, maibé husu tenke hamihis ida ne'e, iha prinsípiu kooperativa nian ispíritu koletivu mak boot liu.
Ikus liu SEKOOP husu ba dirijenti no fundadór Cooperativa Prospéro atu servisu maka'as liu tan hodi loke aan ba ema hothotu atu envolve iha kooperativa.
Prezidente Kooperativa Kréditu Uniaun Prospéro, Leontina dos Santos, agradese ba membru fundadór sira-nia konfiansa hodi lidera Kooperativa ba periudu da-uluk, maibé kontinua husu ba membru sira serivisu hamutuk hodi lori kooperativa ba futuru.
“Agradese ba konfiansa mai ha'u hodi lideransa kooperativa ida ne'e ba periodu dahuluk tanba ne'e kontinua husu atu servisu hamutuk iha futuru mai”, hatete nia.
Iha seremónia ne'e hetan prezensa gusi Asesór SEKOOP, Bonifacio Correia, Diretora GIG, formad’or sira, inklui membru fundadór Cooperativa Prospéro sira. (*)