Abertura ba Asembleia Jerál Kooperativa Kréditu Uniaun ne’ebé tuir lolos Primeiru Ministru, Taur Matan Ruak, rasik mak loke, maibé ho ajenda seluk ne’ebé presiza mós atende maka nomeia Sekretáriu Estadu Kooperativa (SEKOOP), Elizário Ferreira atende atividade refere.
“Tuir mai saida mak ha'u identifika husi ita-boot dezafiu ne'ebé ita-boot sira iha primeiru, dependénsia barak liuba ema ida, imi depende barak liuba mana Domingas (Dirijente Kooperativa CU LANAMONA)’, dehan Elizário Ferreira iha abertura ba Asembleia Jerál CU-LANAMONA iha Salaun Parokiál Ermera-Gleno, sesta (27/05).
Ba ema hotu ne'ebé sai membru kooperativa ida, tanba kooperativa ne'e la'ós ema ida nian maibé membru hotu sai autór ba kooperativa sira nune'e mak membru kada idak-idak envolve, oinsá atu serbisu hamutuk atu kooperativa ida labele mate, tanba ema ne'ebé dirije kooperativa ida sei iha nia rohan maibé instituisaun kooperativa sei laiha rohan.
“Tanba ida ne'e mak imi tenke hahú informa ba malu, tenke prepara joven sira no joven sira mós tenke prepara-an, para ami ho mana Domingas laiha imi bele kaer tutan kooperativa ne'e ba labele ami laiha kooperativa mós mate ona la'ós lakon nakukun mais tau fali naran Helena ‘hela naran de'it’’, afirma nia.
Alende ne'e iha dezafiu segundu ne'ebé mak CU-LANAMONA hasoru mak sei dependénsia eksterior sei iha, ba terseiru parte sei iha tanba ida ne'e mak membru no dirijente sira buka atu redúz dependénsia eksterior ne'e.
Nune’e husu ba dirijente sira atu kontinua unidade hodi halo kontinua reuniaun ho nia membru sira iha kada fulan, tenke ko'alia ba malu kona-ba problema kooperativa nian labele ba ko'alia iha li'ur.
“Asembleia Jerál hanesan ne'e ko'alia imi-nia problema, la'ós asembleia jerál liu tiha mak ko'alia iha kotuk”, dehan nia.
Prezidente CU LANAMONA, Domingas dos Santos hatete, kona-ba progressu ne'ebé mak durante ne'e hala'o no konsege realiza sentru sira iha Ermera ne'e rasik.
“Tanba saida mak ami tama iha Ermera iha loron 29 fulan-agostu tinan 2018, ami halo primeira sentru iha Gleno, ami hahú ho ema na'in-13 iha tempu ne'ebá, tanba ami halo primeira lansamentu iha de'it ema 13 ne'ebé mak kompostu husi feto”, haktuir nia.
Tanba kréditu uniaun LANAMONA hari’i iha Bobonaro tinan 2014 ho nia orsamentu $300.00, dadaun ne'e kontinua hala'o serbisu konsege tama ona iha Munisípiu Ermera, husi tinan 2019 membru CU-LANAMONA sa'e ona ba 216 osan ne'e mak sira rai iha Ermera hamutuk rihun $86.076.00 no osan ne'ebé mak fó no empréstimu ba membru sira hamutuk $123.129.00 no dadaun ne'e iha sentru hamutuk tolu mak Glenu, Fatubessi, Sakoko inklui mós iha Railaku no ida iha Munisípiu Aileu.
Dadaun ne'e LANAMONA iha Munisípiu Ermera oinsá atu halo desentralizasaun hodi jere rasik nia sentru ida ne'e hodi hasa'e ekonomia familia iha Munisípiu Ermera rasik.
Ba servisu ne’ebé hala’o kada sentru sira ne'ebé iha hato'o ona relatóriu ba autoridade munisípiu hanesan termu koñesimentu ba sentru sira iha kada munisípiu sira, no sei kontinua hala'o nia serbisu hodi tama sai munisípiu sira mak hanesan Aileu, iha ona sentru ida. (*)
