Tempotimor (Dili)-Ministru Obras Públikas (MOP), Abel Pires da Silva, partisipa iha enkontru steering Committee ba Portu Baía Tibar ne’ebé lidera husi Ministru Finansas (MF), Rui Augusto Gomes, hodi diskute kona-ba preparasaun Governu nian antes ba operasaun Portu Baía Tibar, ne’ebé sei finaliza no operasaun iha fulan-Outubru, tarde liu iha fulan-Novemnru tinan 2022.

Tuir infprmasaun ne’ebé www.tempotimor.com asesu husi pájina MOP katak, enkontru ne’ebé iha edifísiu Ministériu Planu no Ordenamentu (MPO), Hudi Laran-Dili, hodi ko’alia kona-ba preparasaun Governu nian mak hela konstrusaun estrada protokolu husi Rotunda Prezidente Nicolau Lobato Komoro to’o Tasitolu hodi fasilita operasaun Portu Baía Tibar, liuliu fasilita ekipamentu pezadu halo movimentasaun iha dalan protokolu refere.

Iha enkontru ne’e deside mós halo indiminizasaun ba komunidade hodi fasilita prosesu kontrusaun ho lais liután, hodi nune’e bainhira konstrusaun Portu Baía Tibar remata estrada diresaun Rotunda to’o Tasitolu mós prontu ona hodi fasilita movimentasaun transporte.

Governu iha ona akordu ho kompaña konstrutór Portu Baía Tibar katak estrada protokolu Rotunda to’o Tasitolu tenke finaliza antes konstrusaun Portu Baía Tibar remata no tama iha operasaun, karik la finaliza mak Governu tenke hetan sansaun multa no selu osan lubuk ida ba kompaña tuir kontratu ne’ebé iha.

Enkontru interministeriál ne’e partisipa husi Ministru Finansas, Ministru Obras Públikas, Ministru Transporte no Komunikasaun (MTK), José Agostinho da Silva, Vise Ministru Justisa, Edmundo Caetano, Jestór Unidade Manajementu Projetu (PMU) Portu Baía Tibar, Rui Soares, Diretór sira husi ministériu relevante. (*)