“Eselénsia PR Horta ho Xanana mós ba ona iha ami-nia Ótel hotu iha Malázia no sira komprende kona-ba projetu ne’e, no sira mós sempre fó korajen atu servisu lalais para hanesan ne’e bele hamrik iha Timor-Leste. Ha'u mós hakarak agradese Jenerál Taur Matan Ruak, Primeiru Ministru ho doutór Fidelis nu’udar Ministru Prezidensia Konsellu Ministru tanba sira aselera prosesu to'o ami asina akordu investimentu iha loron 3 janeiru 2022 iha ne'e”, hatete nia hafoin audénsia ho PR Horta iha Palásiu Prezidensiál, Bairopite, kuarta (25/05).
Ba projetu pelican paradise durante ne'e la konsege realiza ninia investimentu iha Timor-Leste tanba hein prosesu administrasaun. Maske akordu investimentu loloos realiza ona iha tinan 2019 maibé afeta husi Covid-19.
Ho situasaun hirak ne'e, iha tinan 2021 Pelican Paradise mós deside halo dezeñu foun ba projetu ida ne'e, no espera katak prosesu sira ne'e bele finaliza ona iha fulan-juñu, atubele hahú prosesu konstrusaun iha fulan-novembru 2022.
“Problema ne'e uluk problema administrasaun to'o ami foin lala'is ne'e iha 3 janeiru foin asina akordu investimentu entre Governu ho palican paradise, tanba ne'e prosesu ne'e han tempu naruk nomós tanba projetu boot tebtebes entaun tenke tetu ho didi'ak agora prosesu hothotu ne'e la'o diak”, esplika nia. (*)