“Hodi konsidera interese boot ne’ebé medida ne’e kria hamutuk ho setór privadu, Governu konsidera ne’e relevante atu hametin apoiu sira iha kuadru liña kréditu sira ne’ebé introdúz iha alterasaun hirak tuir-mai ne’e”, dehan Ministru Prezidénsia Konsellu Ministru, Fidelis Manuel Leite Magalhães, iha Palásiu Governu, segunda (16/05).

Ba alterasaun hirak ne'e mak, inkui posibilidade empreza boot sai benefisiária, valór totál husi liña kréditu aumenta ba dolar amerikanu millaun limanulu, Valór limite másimu husi valór garantia kréditu ne’ebé fó ba kada empreza mikru, ki’ik, mídia ne’ebé selesiona atu hetan benefísiu husi medida ne’e aumenta ba dolar amerikanu rihun-atusrua-limanolu.

“Valór limite másimu garantia kréditu ne’ebé fó ba kada empreza boot ne’ebé selesiona ona atu hetan benefísiu husi medida ne’e aumenta ba dolar amerikanu millaun ida”, informa nia.

Prazu másimu husi kontratu muda husi tinan 3 ba tinan 10. Tanba alterasaun bakuadru normativu liña kréditu “Fasilidade Garantia Kréditu Suave” ne’e atu konkretiza kompromisu ne’ebé iha Programa Governu nian atu kria kondisaun posivel sira hotu atu hasa’e diversifikasaun ekonómika, iha área produtiva, hanesan iha agrikultura, pekuária, peska no turizmu, aleinde setór indústria. (*)