Ministru Prezidénsia Konsellu Ministru (MPKM), Fidelis Manuel Leite Magalhães esplika, Diploma ida-ne’e regulamenta Fundu Kombatente Libertasaun Nasionál no estabelese modelu investimentu osan fundu nian, objetivu atu hetan rendimentu no atu asegura ninia permanénsia.

“Fundu ida-ne’e, sei iha dotasaun inisiál US$1.000.000.000,00 (dolar amerikanu billaun ida) sei sai hanesan fundu autónomu no iha autonomia administrativa, finanseira no patrimonial”, informa Fidelis Magalhães iha Palásiu Governu, tersa (17/05).

Ba objetivu husi fundu ne’e mak atu finasia programa apoiu sira ba Kombatentes Libertasaun Nasionál, liliu iha área apoiu sosiál, edukasaun, saúde, empregu, asesu ba kréditu no atividade ne’ebé hetan rendimentu.

Nune'e mós fundu ne’e sai mós responsavel husi pagamentu prestasaun pekuniária únika ne’ebé prevee iha Estatutu Kombatente Libertasaun Nasionál. (*)