“Ho ksolok no satisfasaun boot, ohin loron ha’u partisipa iha Serimónia Lansamentu Fatuk Dahuluk nian ba Konstrusaun Timor Marina Square, ne’ebé konkretiza prioridade sira nasaun nian iha prátika no iha posibilidade hodi kumpre objetivu nasionál sira ida ne’ebé boot, ho projetu privadu ida, ne’ebé finansia husi fundu internasionál sira ne’ebé posibilita aparesimentu operadór ekonómiku foun ida iha setór Turizmu nian”, dehan Taur, iha Largo Lesidere, hafoin Lansa Fatuk Dahuluk ba Konstrusaun Timor Marina Square, tersa (17/06).
Serimónia ida ne’ebé marka inísiu husi prosesu ida ba reabilitasaun urbana ne’ebé hala’o iha área importante ida-ne’e iha Largo Lesidere, ho infraestrutura foun ida ne’ebé moderna, efisiente, sustentavel iha nível ekonómiku no ambientál.
Tanba ne’e sei disponibiliza la’ós ba de’it servisu foun sira ba sidadaun, turista, investidór no emprezáriu sira ne’ebé vizita Timor-Leste, liuhusi otél, restaurante, estabelesimentu komersiál no apartamentu sira, maibé mós oferta oteleira sira nasaun nian ne’ebé di’ak no kualidade servisu nian sira ne’ebé fó ba ita-nia utente sira.
“Projetu ida ne’ebé marka ritmu kreximentu no progresu nian ne’ebé ita dezeja ba nasaun, ho inovasaun no kriatividade e empreendedorizmu privadu barak liu, hodi estimula aparesimentu jerasaun trabalhadór foun ida ne’ebé kualifikadu no operadór ekonómiku sira”, hatete nia.
Ba investimentu ne’e kontribui duni ba objetivu boot sira Governu nian, ne’ebé mak ezije husi sidadaun sira, liliu joven Timoroan, ne’ebé buka oportunidade foun sira kona-ba formasaun no empregu nian, ne’ebé bele hasae ninia abilitasaun no kompeténsia sira, nomós fonte sira rendimentu nian, moris-di’ak no kualidade moris nian.
Ministru Koordenadór Asuntus Ekonómikus (MKAE), Joaquim Amaral hatete, Konstrusaun Timor Marina Square ne'e reprezenta kreximentu no modernu ba nasaun Timor-Leste.
Nune'e Governu investe dolar Amerikanu Millaun 50, ba Konstrusaun refere, tanba hatudu kompromisu no konfiansa husi investidór externu sira ba Timor-Leste nia futuru ne’ebé koletivu.
“Kapitál investimentu millaun 50, ne'e investimentu puru, investimentu privadu, durasaun ba konstrusaun ne'e lori 30 meses, atu termina konstrusaun ne'e hahú husi servisu fiziku iha terrenu”, dehan Joaquim.
Ho ida ne'e Governu, agradese ba Reprezentante husi Empreza Timor Marina Square S.A, no ba CEO hosi Empreza “A-Smart Holdings Ltd”, Lim Huan Chiang, ba investimentu ne’ebé realiza iha Timor-Leste.
“Hakarak transmite ha’u-nia apresu ba hothotu ne’ebé kontribui ona ba konkretizasaun hosi investimentu ida-ne’e, ne’ebé onra tebes no hana’i ita”, afirma nia. (*)
