“Ha'u bolu imi mai atu ko'alia ho imi, hodi kona-ba imi-nia problema sira no ha'u husu ba imi kontinua hatudu imi badinas iha suku sira, tanba imi hatene presiza hadi’a kooperativa sira iha suku laran”, dehan Sekretáriu Estadu Elizário ba OMM Manatutu iha Salaun Madre sira iha Laklubar, kinta (12/05).

Alende ne'e OMM sira aprezenta sira-nia problema sira ne'ebé mak durante ne'e hasoru mak antes ne'e kooperativa balun ne'ebé mak eziste ona maibé seidauk iha koñesimentu ba jere nune'e kooperativa hirak ne'e la funsiona ho di'ak.

OMM destaka iha Postu Administrativu Natarbora, Luisa Fátima, aprezenta problema sira iha terrenu mak jerente no membru sira ne'ebé maka lakohi devolve osan kooperativa nian.

“Ami-nian mak sei susar, sira atu kria grupu ki'ik ne'e iha ona mais atu muda fali ba kooperativa ne'e buat ne'ebé ami presiza estuda tan, tanba ami tanba susar loos tanba sira fiar liu tiha ona ba akontesimentu uluk mak jerente sira han tiha osan kooperativa nian nune'e susar mak ami”, dehan nia.

Iha Postu Administrativu Natarbora iha kooperativa rua ne'ebé mak la funsiona mak hanesan KAHA no DAHO ne'ebé mak hosoru problema hanesan mak membru sira la devolve osan empreza no seluk mak jerente sira la fó fila osan kooperativa nian ka membru sira-nia osan.

Sekretáriu Estadu Kooperativa orienta OMM sira ne'e atu hasoru dirijente kooperativa sira atu halo fali karta ida ba SEKOOP atu halo despaixu ba diresaun kompetente sira hodi apoiu filafali desiminasaun no informasaun hodi nune'e kooperativa sira bele normaliza filafali. (*)