Iha reuniaun kortezia ne’e, parte rua ko’alia kona-ba asisténsia tékniku husi USAID Timor-Leste nia Projetu Reforma Aduaneira ne’ebé hahú iha Juñu 2017 no remata ona iha Setembru 2021.
Durante tinan haat nia laran, Projetu Reforma Aduaneira konsege ajuda reduz atrazu iha tempu importasaun sasán 65% no tempu esportasaun sasán 74%, uzu pista verde (Green Land) sa’e ba 71%, estabelese liña direta alfandegáriu (Customs Hotline 12200), lansa portál komérsiu alfandega, aprova ona planu estratéjiku Autoridade Aduaneira ba tinan-lima.
Ho konkista hirak ne’e, parte rua mós diskute oinsá atu kontinua hametin liután servisu parseria ne’e liuhusi dezenvolve atividade foun sira, tanba detalla sei anúnsia iha tempu tuir-mai.
Iha ne’e, parte rua mós diskute Projetu Parseria Públiku-Privada (PPP) Kristu Rei ho kustu millaun $3 ne’ebé mak daudaun ne’e, iha ona faze finalizasaun Estudu Viabilidade no Projetu PPP Portu Díli ho kustu estimativu millaun $156 ne’ebé mak iha ona faze Estudu Viabilidade.
Projetu PPP rua ne'e hetan asisténsia tékniku husi USAID's Tourism For All Project, tanba tuir planu, lansamentu aprovizionamentu ba Projetu PPP rua ne’e sei realiza iha tinan ida-ne’e nia laran.
Iha enkontru ne’e Ministru Rui Gomes hetan akomapaña husi Komisáriu Autoridade Aduaneira, José Abilio, Xefe Gabinete, David Guterres no staff Gabinete Ministru Finansas. (*)
