“Tinan ne'e, Komunidade Suku Seloi Malere enfrenta maka'as infraestrutura báziku ne'ebé halo travamentu ba dezenvolvimentu ekonomia, liliu estrada no ponte ne'ebé aat hela hodi difikulta komunidade lori sira-nia produtu lokál ba merkadu nomós estudante sira tenke hakur mota hodi ba eskola, ne'e mak dezafiu ne'ebé komunidade Suku Seloi Malere enfrenta”, dehan Xéfe Suku Jacinto Ribeiro Diaz hafoin partisipa lansamentu Filme Badak Husi Plan Internasionál Timor-Leste iha Salaun Fundasaun Oriente Bairro dos Grilhos, kuarta (11/05).

Tanba kada tinan, foti infraestrutura báziku sai hanesan Planu Primadona, ne'ebé sempre halo levantamentu iha Postu Administrativu nomós Munisípiu rasik hodi tau matan ba asuntu infraestrutura.

“Fulan ne'e, Suku Seloi Malere enfrenta tan problema boot hanesan Ponte ne'ebé tohar hodi hakotu ligasaun entre Postu Saúde no Suku Oholau ne'ebé lokaliza iha Suku Seloi Malere nia sorin”, informa nia.

Alternative ne'ebé komunidade sira halo mak tesi ai hodi halo dalan ba sira atu la'o, tanba dadaun ne'e, tempu kafé komunidade presiza lori sira-nia produtu ba fa'an iha merkadu nomós kooperativa bele sosa komunidade sira-nia kafé hodi responde ba prekupasaun komunidade nian.

Kona-ba área edukasaun no Saúde iha Suku Seloi Malere la'o ho di'ak inklui programa sira kontinua la'o hanesan babain. Tanba taxa partisipasaun ba vasina la'o ho di'ak no parte saúde sira kontinua halo vasinasaun iha Eskola hotu la'o ho di'ak.

Nune'e, husu ba Prezidente Repúblika Eleitu, José Ramos Horta, hodi haree dezafiu ne'ebé komunidade sira enfrenta hanesan infraestrutura báziku, kualidade edukasaun, saúde, eletrisidade no bee-moos atubele hadi’a hodi komunidade sira bele asesu ba dezenvolvimentu ekonomia. (*)