“Proposta de lei númeru 38/V (4a) kona-ba primeira alterasaun lei númeru 1/2022, loron 3 janeiru, Orsamentu Jeral Estadu para 2022, segundu alterasaun lei númeru 8/2008, loron 30 juñu, lei tributária no kriasaun fundu Kombatente Libertasaun Nasionál, aprovadu iha finál global”, dehan Prezidente PN, Aniceto Longuinhos Guterres Lopes, hafoin anúnsia rezultadu votasaun iha plenária PN, kuarta (11/05).
Ba Orsamentu Retifikstivu ne'e Governu aloka orsamentu ba medida komplementár 13 ne'ebé prevee iha Proposta Retifikativu ho montante billaun $1,129, mak Kriasaun Fundu Kombatentes Libertasaun Nasionál ho orsamentu alokadu billaun $1, Pagamentu $200 ba kada família (exeptu funsionáriu públiku sira), millaun $70 nomós Uma Kbi’it La’ek Plus, millaun $25, Bolsa Estudu ba Mellór Graduadu Estudante Ensinu Báziku no Sekundáriu, millaun $7,5.
Aleinde Medida tuir mai maka Programa Mão de Obra ba Postu Administrativu, millaun $7,2, Revitaliza kafé no subsídiu ba kafé Laku-teen, millaun $6,4, Pagamentu ba diferensa remunerasaun Polísia Nasional Timor-Leste (PNTL) nian ho rejime salariál foun ba membru PNTL 4.096, millaun $5,1.
Hari’i Sede Arte Marsiál no Rituál, millaun $2,5. Programa Eskola iha Uma, millaun $2,1. Internet gratuita iha eskola sira, millaun $1,1. Subsídiu akomodasaun ba PNTL no F-FDTL, millaun $1,9.
Estabelesimentu Sekretaria ba Asuntu Traballadór iha rai-liur no Komunidade Timoroan iha Diáspora, $500 mil; Empregu ba mellór alunu universitáriu sira, $437,5 mil.
Tuir klarifikasaun despeza no ekonómiku ne'ebé Governu aprezenta liuhusi proposta Orsamentu Retifikativu Billaun 1.129 mak, reseita Konsolidada Setór Públiku Administrativu sa’e ba $3.234.522.481, enkuantu Despez Konsolidada Setór Públiku Administrativu sa’e ba $3.233.908.681. Reseita husi Órgaun Servisus Administrasaun Sentrál sa’e ba $2.987.140.197.
Maibé ba aprovasaun proposta OR ne'e, Vise Xefe Bankada CNRT, Patrocino Fernandes, konsidera orsamentu ida ne'e atu kumpre de'it kompromisu kampaña eleisaun Prezidensiál ne'ebé mak halo husi partidu plataforma tolu iha Governu daualu.
“Ohin Bankada Governu vota hodi fó-pasa Orsamentu Retifikativu tanba ninia objetivu loloos maka atu kumpre de’it promesa eleitorál, ne’ebé Plataforma Entendimentu halo ba povu durante kampaña segunda-volta iha Eleisaun Prezidensiál liubá”, dehan nia.
Maske Governu mai ho razaun oioin katak orsamentu retifikativu ida ne’e atu responde ba krize ekonomia rai laran ne’ebé kauza husi pandemia no funu iha Ukránia, maibé realidade loloos mak hanesan deputada, Maria Angelina Sarmento deklara, “Esénsia husi Orsamentu Retifikativu ida ne’e mak promesa sira ne’ebé Primeiru Ministru halo durante kampaña ba Kandidatu Francisco Guterres ‘Lú Olo’.
Bankada CNRT lamenta bainhira Bankada Governu uza argumentu katak levantamentu sira iha Governu anterior maka inspira Governu atuál hodi halo levantamentu to’o tiha Billaun $3,2 ba Orsamentu tinan 2022 ne’e nian. (*)
