Tuir informasaun ne’ebé www.tempotimor.com asesu katak, KAFI iha loron sesta (06/05) aprova ona Dezeñu Enjenária Detalladu (DED) ba projetu konstrusaun estrada munisipál iha munisípiu Baukau husi postu administrativu Laga ba to’o postu administrativu Baguia, ne’ebé aprezenta husi Ministru Obras Públikas (MOP), Abel Pires da Silva, liuhusi enkontru KAFI iha salaun enkontru Ministériu Planu no Ordenamentu (MPO), Hudi-Laran, Dili.
Hafoin aprova iha KAFI, Ministru Obras Públikas sei lori fali projetu estrada Laga-Baguia ba Konsellu Ministru delibera atu loke prosesu konkursu públiku, para hetan manán na'in hahú konstrusaun ba projetu refere.
Enkontru KAFI ne’e lidera husi Prezidente KAFI, José Reis, atuál Vise Primeiru Ministru no Ministru Planu no Ordenamentu (V-PM no MPO), partisipa husi Ministru Finansas (MF), Rui Augusto Gomes, Ministru MOP rasik, Ministru Transporte no Komunikasaun (MTK), José Agostinho da Silva, tékniku Diresaun Nasionál Estrada, Ponte no Kontrollu no Seias (DNPCC), parte husi Sekretariadu Grande Projetu (SGP), inklui tékniku sira husi Ministériu relevante. (*)