“Kooperativa ne'e hahú ho inisiativa komunidade nian no Estadu ninia papél atu promove tanba kuandu kooperativa ida hahú iha estadu ninia papél atu eduka forma hodi asegura ninia sustentabilidade instituisionál estabilidade finanseira no estabelidade ekonómika kooperativa nian hodi asegura moris di'ak vida ekonómika familia nian ba prosperidade membru sira-nia atubele kontribui ba dezenvolvimentu ekonomia sosiedade nian”, dehan Elizário Ferreira ba jornalista sira iha Aldeia Kuluhun, Suku Fuiluro, Postu Administrativu Lospalos, Munisípiu Lautein, tersa (03/05).

Papel seluk ne'ebé SEKOOP atu apoiu mak hanesan kréditu Uniaun ne'e oinsá maka atu f’o asesu finanseira ba membru sira jere osan ne'ebé membru ninian ho di'ak kapitaliza membru sira liuhusi empréstimu jurus ida viável atubele konstitui ba atividade ekonómika membru sira-nian hodi produz efeitu ba vida ekonomia família nian.

Tanba ne'e, mak nia husu ba membru no dirijente kooperativa sira hotu liliu iha Munisípiu Lautein atu kontinua servisu hamutuk hodi tane kooperativa sira iha zona Lospalos nian.

“Liliu zona Lospalos, Munisípiu Lautein ba ekonomia nasionál nomós ida ne'e mak papel importante husi kooperativa ninia serbisu”, dehan nia.

Alende ne'e Reprezentante Administradór Munisípiu Lautein, Sekretáriu Administrasaun, Jacinto da Costa afirma, sei apoiu nia sidadaun sira iha Munisípiu Lautein tomak hodi bele asesu ba kooperativa sira, tanba envolvimentu iha kooperativa iha duni benefisia ba nia membru sira.

“Tenke la'o hamutuk kooperativa siknifika koopera ativa, siknifika kooperativa tiha tenke ativa, bainhira ita-nia servisu hamutuk atu koopera malu, atu ita bele ativa iha vida sosiu ekonómika”, orienta nia.

Alende ne'e Sekretáriu Administrasaun ne'e mós agradese ba Membru SEKOOP liliu Organizador Motivadór Mobilizadór tanba konsege ona halibur ema sira hotu iha Munisípiu sira hodi bele envolve iha kooperativa nian.

Bainhira ema ki'ik sira rai osan hamutuk, ikus ami ema riku, sira bele empresta ema ki'ak nia osan no bele hetan nia funan iha kooperativa ida.

“Kooperativa ne'e buat di'ak buat furak ema ki'ik no ema ki’ak sira mak hamutuk lakleur ema riku sira mai Empresta ita-nia osan tanba ita hamutuk ita forte ona, ida ne'e mak importante ha'u fó korajen ba imi, buka tan membru tan”, dehan nia.

Tanba ne'e husu ba juventude husi Munisípiu Lautein, atu tane liman hamutuk hodi haforsa no hakbi’it iha nia suku laran sira. (*)