“Hahú husi lideransa, lideransa ne'e xave ba dezenvolvimentu Kooperativa nian tanba ne'e tenke komunika maka'as foin hanesan ne'e reuniaun konsellu diretiva ne'e semana ida dala ida para komunika ba malu, tanba ne'e konsellu diretiva nia papél importante ida mak ko'alia ba malu”, dehan SEKOOP Elizário Ferreira bainhira partisipa asembleia Jerál kooperativa CCUP nian iha, aldeia Kuluhun, Suku Fuiloru, Postu Administrasaun Lospalos, Munisípiu Lautein, tersa (03/05).
Tanba iha kooperativa ida nia laran lideransa mak sai espellu, tanba membru hothotu sei haree estrutura sira, tanba ne'e tenke hatudu ezemplu di'ak iha servisu hamutuk ne'e.
“Bainhira iha Empresta mak lideransa la selu, macet to'o fulan ida ka rua, membru kooperativa sira komesa ko'alia ba malu, lideransa sira de'it la selu di'ak ita depois mak selu de'it”, haktuir nia.
Ba lideransa iha estrutura kooperativa ida nia laran tenke iha diversidade ka diferente hanoin tanba halo sira sai kreatividade no servisu maka'as.
“Papel ida seluk mak iha estrutura ida nia laran tenke iha diversidade ka diferente hanoin, tanba ema diferente hanoin ne'e mak halo ita kreativu, halo ita serbisu, tanba ha'u iha kooperativa durante tinan 20 ona pos independente, tanba ha'u-nia prezensa ne'e atu eduka motiva ha'u laiha Sekretáriu Estadu Kooperativa imi mós mate tiha”, dehan nia.
Iha ámbitu Asembleia Jerál Kooperativa Kréditu Uniaun Prosperidade ne'e Sekretáriu Estadu Kooperativa mós hato'o nia parabéns ba estrutura no membru sira tanba bele realiza ona eventu ne'e.
Hafoin, Asembleia Jerál SEKOOP sei haruka filafali diresaun seluk husi SEKOOP hodi fó formasaun, no partisipa mós tomada posse ba estrutura kooperativa nian.
Alende ne'e mós husu ba lideransa Kooperativa CCUP bainhira servisu maka'as to'o hetan membru 250 SEKOOP sei apoiu fundu $10.000.00 hodi hari’i sede kooperativa nian iha sira-nia Aldeia.
Dadaun ne'e, CCUP iha ona membru hamutuk 78 (na’in-hitunolu-resin-ualu) mane na’in-33 no feto na’in-45 foin halo atividade iha fulan ualu (8) nia laran.
Kapitál atuaál Kooperativa Prosperidade iha $9.907,50, membru Kooperativa 65 (neennolu-resin-lima) mak assesu Créditu husi Cooperativa Creditu Uniaun Prosperidade (CCUP) Cooperativa (CCUP) hetan akompañamentu husi SEKOOP. (*)
