Print this page

AIFAESA ho KAK Estabele Estratejia Monitorizasaun ba Distribuisaun Sesta Bázika

Ekipa KAK hasai foto hamutuk ho Ekipa husi AIFAESA. Ekipa KAK hasai foto hamutuk ho Ekipa husi AIFAESA. Foto Suplay

Tempotimor (Dili)-Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) hamutuk ho Komisaun Anti Korrupsaun (KAK) diskute estratéjia kooperasaun institusionál iha monitorizasaun ba programa distribuisaun Sesta Bázika faze daruak-nian.

Tuir informasaun ne’ebé www.tempotimor.com asesu husi pájina AIFAESA katak, programa distribuisaun Sesta Bázika faze daruak sei implementa tuir kalendáriu defenidu hosi entidade implementadór sira.

Iha diskusaun ne’e, Adjuntu Komisáriu KAK, Luis de Oliveira Sampaio, agradese ba servisu hamutuk entre instituisaun rua ne’e, liga ho programa distribuisaun Sesta Bázika iha tinan liuba hodi salva no proteje benefisiáriu sira ne’ebé elejivel ba direitu Sesta Bázika iha faze dahuluk.

Husi kooperasaun ne’e konsege prevene kompaña sira ne’ebé la hatudu sira-nia integridade atu apoiu polítika Governu nian, ho esperiénsia tinan 2021 nian KAK konsege deskobre iregularidade lubuk ida.

Ho esperiénsia ne’ebé iha ona mak instituisaun rua ne’e halo diskusaun no kooperasaun institusionál iha monitorizasaun, kontrolu no prevensaun ba distribuisaun produtu Sesta Bázika daruak nian tuir kompeténsia ne’ebé atribui ona ba AIFAESA no KAK.

Inspetór Jerál AIFAESA, Ernesto Monteiro haktuir kona-ba kompeténsia kontrolu AIFAESA nian haree liuba kualidade no kuantidade.

Enkuantu ba kuantidade rasik AIFAESA iha ekipamentu hodi tetu maibé ba kualidade presiza iha ekipamentu hodi deteta teor bee iha produtu fos, inkui padraun hodi identifika produtu sira.

Partisipa iha diskusaun ne’e, Inspetór Jerál, Ernesto Monteiro, Xefe Gabinete, Filipe Gomes, Diretór Departamentu Planeamentu Operasionál Risku Alimentár no Laboratóriu, Ângelo Belo, Diretór Operasaun, Viriato Paulo, Xefe Divizaun Metrolojia, Januario Mendes de Jesus no delegasaun husi parte KAK nian. (*)

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items