Tanba Primeiru Ministru konsidera Ministériu Agrikultura no Peska mak responsável ba problema hasa’e produsaun iha rai-laran no MTKI mak Ministériu ida ne’ebé haforsa produtór sira hasa’e produsaun depois organiza hodi lori ba fa’an iha merkadu.
“Nune'e ohin ami mai iha ne'e, hamutuk ho primeiru ministru diskute kona-ba ba kadeia valór katak oinsá haforsa setór produtivu sira liuhusi kooperasaun liña ministerial”, dehan Ministru Turizmu Komérsiu no Indústria (MTKI), José Lucas do Carmo da Silva, iha Rezidénsia PM Faról, tersa (03/04).
Atu normaliza presu sasán nesesidade báziku iha rai-laran mak persiza aumenta produsaun iha rai-laran liuhusi ezisténsia setór produtivu sira hodi prodúz barak liután.
Aleinde ne'e Governu planea sei fó mós kréditu ba empreza distributór sira ne’ebé mak durate ne’e halo distribuisaun ba sasán nesesidade bazíka nune’e bele fa’an sasán ho presu normal ba konsumidór sira iha Timor-Leste.
“Asuntu presu nesesidade ne’ebé agora sa’e maka’as ida ne’e mak asuntu pertinente primeiru ministru haree katak presiza servisu hamutuk atu halo balansu ka intervensaun ba presu ne’e rasik, tanba ne’e mak MTCI haree oinsá haforsa liután empreza ki’ik sira liuhusi kréditu ne’ebé durante ne’e iha ona hanesan kréditu Soabe”, dehan nia.
Entretantu Governu sei halo distribuisaun sesta bázika ba populasaun iha Timor-Leste, iha tempu besik, tanba programa sesta bázika hanesan mós meius ida atu halo intervensaun ba presu sasán iha merkadu. (*)