“Kompaña ne’ebé mak oferese de’it ba Governu ne’e ha’u haluha nia naran, mais ne’e Timoroan di’ak ha’u agradese ba nia. Ita hein katak kompaña hothotu laran luak hanesan ne’e, ne’ebé kuandu bee sobu favór ida besi-besik imi-nia uma oin ne’e ajuda ba. Iha kompaña ida, iha dalan ba Metiaut Ótel SK ninian estrada tuun mai ne’e, liu tiha Ótel Kalifornia, iha ne’eba estrada ne’e rai ho bee mai komu mota laiha mai sobu halai fali ba estrada, agora kompaña timoroan ida iha ne’eba ha’u la hatene nia naran, nia hasa’e tiha ninia fatin ne’e (moru), eskavatór sira iha laran, bee mai ho rai, fatuk sobu estrada, nalihun iha estrada tuun sa’e mais nia la interese, nia mak halo tiha buat ne’e mais nia la sente ne’e ninia responsabilidade. IJE (Institutu Jestaun Ekipamentus) ba hamoos mós nia la halo buat ida, mákina iha laran hela, kompaña sira hanesan ne’e mak la kontribui buat ida ba estadu ne’e”, dehan Ministru Abel ba jornalista bainhira halo inspesaun ba reabilitasaun estrada iha Tasitolu.
Tanba kompaña balun ne’ebé ninia naran tama iha lista projetu 143 nian, bainhira halo verifikasaun empreza ida mak hakarak oferese de’it projetu refere no lakohi Governu selu tanba projetu ne’e nia halo hanesan kontribuisaun de’it ba estadu.
“Projetu 44 mak seidauk (selu) mais ita verifika ida oferese ba estadu de’it, nia dehan ha’u lakohi, la presiza halo pagamentu, estrada oan ida husi Novu Turizmu mai Palásiu Governu, ne’e uluk sira hadi’a, sira dehan haluha ona, entaun hela projetu 43. Projetu 43 ne’e mós balun afinál projetu foun mai tender tiha ona be nia la relevante ona, entaun hela projetu 42, ne’ebé iha balun ita presiza prosesa, iha barak mak seidauk halo buat ruma, ne’e sei iha desizaun oin seluk, iha balun la’o ona, iha balun kompletu tan ona, ne’ebé bazeia ba kondisaun sira ne’e mak ita fó rekomendasaun para depois KAFI (Konsellu Administrasaun Fundu Infraestrutura) mak tetu, KAFI mak deside, ami-nia obrigasaun mak halo avaliasaun depois fó rekomendasaun”, informa nia.
Projetu hirak ne’ebé MOP tenta rezolve mak momentu sei iha Parlamentu Nasioál halo ona verifikasaun, servisu hamutuk ho Vise Ministru Obras Públika, dadaun preparasaun relatóriu ba fali KAFI, tanba ne’e projetu fundu infraestrutura sira de’it ne’ebé tenta resolve.
Tanba ne’e sei rezolve problema tuan ne’ebé mak mosu dezde 2017, mais ne’e responsabilidade estadu nian, Governu kontinua tau-matan ba ida-ne’e, ho neneik.
Projetu emerjénsia 42, daudauk ne’e iha ona eprezentasaun finál no hein hela relatóriu no husi relatóriu hirak ne’e mak MOP sei asina no lori ba KAFI hodi hetan aprovasaun. (*)