“Buat ida ne'ebé mak ha'u atu dezafiu oituan mak mak ne'e, kooperativa ne'e base member la'ós base money, kuandu membru aumenta barak, osan aumenta barak tinan neen (6) ona nia iha membru foin atus ida sia (109) la hatene tinan ida imi lori ema na'in hira?. Entaun ha'u-nia dezafiu ida ba ita-boot sira oinsá bele hadi’a imi-nia desempeñu oinsá atu mobiliza membru”, dehan Elizário Ferreira iha nia intervensaun iha inaugurasaun Sede Kooperativa Bieky Sahe Vemasse Baukau, sábadu (30/04).
Tanba ne’e, labele lakon osan halo uma ida, maibé bibi mak hela fali, tanba haree merkadu barak mak animál sira liliu fahi no bibi mak hela maibé SEKOOP husu ba kooperativa sira labele abandona bibi no fahi mak hela maibé atu utiliza didi’ak uma ne'e ba serbisu.
“Ha'u haree iha merkadu sira bibi mak hela du'ut mesak narnaruk de'it no bibi mak sa'e, ida ha'u-nia lakohi bibi mak hela no labele akontese iha ita-nia kooperativa kuandu halo ona sede siknifika tenke utiliza ba servisu no tenke ema mak serbí”, hatete nia.
Dirijente Kooperativa Kooperativa Kréditu Bieky Sahe (CCBS), Francisco dos Santos, sente kontente tanba iha ona edifísiu ida hodi bele sustentavel ba sira-nia kooperativa.
“Agora dadaun halo inaugurasaun ba ami-nia edifísiu kooperativa Bieky Sahe ba ami nu'udar membru ami kontente tebetebes tanba ami-nia edifísiu iha ona”, afirma nia.
Tanba ne’e sei kontinua buka membru sira hodi bele resposta tuir saida mak Sekretáriu Estadu Kooperativa ezije ona.
“Agora ba oin hanesan ohin sia eselénsia ko'alia ami tenke servisu maka'as atu nune'e bele aumenta membru tanba forsa iha kooperativa ne'e membru ida ne'e mak agora ami esforsu”, deklara nia.
Nune’e buka nafatin membru iha suku Viziñu sira oinsá sira bele envolve iha kooperativa sira hodi bele fasilita nia oan sira hodi asesu ba eskola no fila liman sira.
Alende ne'e mós kontinua husu ba SEKOOP, atu apoiu nafatin formasaun ba membru sira tanba membru barak mak seidauk hatene kooperativa nia lala'ok iha Bieky Sahe nian.
SEKOOP apoiu orsamentu montante $10.000.00 no kooperativa Bieky Sahe aumenta $1.000.00 resin hodi halo kontrusaun ba edifísiu refere, nune'e konstrusaun refere totál hamutuk 11.000.000 resin.
Kooperativa Bieky Sahe ne'e funda husi Sekretáriu Jerál FRETILIN Sahe desde iha tempu okupasaun Indonézia to'o ohin loron, osan totál iha kooperativa XCBS totál ne'e dadaun totál fundus hamutuk $48.959,25. (*)
