Tanba programa abitasaun atu hari’i bairru foun iha Hera, daudauk ne’e Ministériu Obras Públika liuhusi tékniku sira hahú halo konsultasaun públika. Uma ba abitasaun foun ne’e sei hari’i ho modelu Parséiru Públiku Privadu (PPP) ne’ebé sei involve empreza nasionál no internasionál iha prosesu konstrusaun refere.
“Ita tenta hela hari’i bairru foun iha Hera, ne’eba ne’e pruvolta 2000 casas, agora ita foin to’o ona nível konsultasaun públika ba populasaun sira iha ne’eba e semana kotuk dehan konsultasaun la’o di’ak, agora ita hein de’it halo dezeñu ne’e remata bele halo konstrusaun ona, dezeñu agora iha prosesu hela”, dehan Ministru Abel oin lalais ne’e.
Ministériu nia dezeñu prontu ona, hein tan konsultór mai atu haree apoiu liután, Ministériu bele halo konstrusaun, maibé tenke iha tender, tanba ne’e hakarak halo ho mekanízmu Governu ho entidade privadu PPP.
“Atu implementa ita sei implementa, agora atu finaliza ne’e buat ketak ida, bazeia ba fatór oioin, purizemplu balun lakohi muda, ne’e han tempu oituan iha ne’eba, mais ita komprometidu atu implementa iha tinan ne’e”, afirma Abel.
Ba reabilitasaun ba estrada ku'ak sira iha kapitál Dili no atendimentu emerjénsia ba estrada kauza husi dezastre naturais ne'e servisu hamutuk entre MOP no parséiru sira mak halo atendimentu ba estragus sira ne'e. (*)