“Agora estrada boboot sira ne'e hahú iha mudansa, pur ezemplu estrada Laga ba Baguia ke ema barak kestiona ne'e verikasaun ADN hotu tiha ona, agora hein de'it aprovasaun husi KAFI e karta atu hatama ba KAFI ne'e ha'u asina tiha ona, ne'ebé dentru de tinan ida ne'e ami sei halo konstrusaun”, dehan Abel Pires ba jornalista sira iha Palásiu Governu, kuarta (27/04).

Alende ne'e mós iha diresaun estrada husi Uaiaka to'o Ossu tempu badak sei haruka ba Konsellu Ministru hodi halo aprovasaun atubele haree no halo konstrusaun foun.

“Ida tan estrada husi Uaiaka-Kelikai ba Ossu ne'e mós ami hatama ona mai Konsellu Ministru atu halo aprovasaun ne'ebé tinan ida ne'e ita sei halo konstrusaun foun”, informa nia.  

Nune'e mós iha diresaun Dili ba Aileu-Sarlala, ne'e mós agora hadi’a ona, no rezolve ona hafoin akontese inundasaun no estragu totál.

“Ita halo mudansa barak ita-boot sira haree iha Dili laran ita halo ona konstrusaun, ne'e mós dalan ba Sarlala ne'e ita (jornalista) haree ba agora ita komesa muda, asesu ne'e di'ak ona, uluk parte Manleuana nian ne'e taka totalmente agora moos tiha ona ba parte ida iha aldeia iha uma adat oan ne'e mak, horseik no ohin rezolve ona”, afirma nia.

Antes ne'e mosu biriokrasia, iha instituisaun estadu liliu kona-ba prosesu konstrusaun estrada sira maibé MOP hahú mudansa ba impedimentu sira ne'ebé enfrenta hodi hafasil prosesu sira. (*)