Tuir informasaun ne’ebé www.tempotimor.com asesu husi pájina Ministériu Obras Públika, tersa (26/04) katak, Diretór Misaun Reprezentante Banku Dezenvolvimentu Aziátiku, Sunil Mitra, akompaña husi tékniku sira aprezenta projetu estrada sira ne’ebé finansiadu husi Fundu Impréstimu ADB nian ba Ministru Obras Públikas (MOP), Abel Pires da Silva, iha edifísiu ADB, Faról, Dili.
Iha enkontru ne’e aprezenta kona-ba progresu preparasaun ba reabilitasaun estrada nasionál sira seksaun husi Lautein-Kom, Lautein-Lospalos no Lospalos to’o Vikeké ne’ebé daudauk ne’e iha ona prosesu ba tenderizasaun.
Aliende ne’e aprezenta mós projesu infraestrutura sira seluk ne’ebé finansiadu fundu impréstimu husi ADB.
Ba enkontru dahuluk hafoin simu pose hanesan Ministru Obras Públikas, tanba ne’e, agradese no sei hametin liután koordenasaun hodi aselera projetu infraestrutura liliu projetu estrada.
Iha ne’e, ADB mós agradese Ministru Abel nia prontidaun no servisu hamutuk di’ak liután.
Enkontru ne’e partisipa mós husi Jestór Unidade Manajementu Projetu (PMU) estrada, Sidónio da Costa Freitas, inklui tékniku sira iha MOP. (*)