"Iha tinan-2022 agora, ita halo reabilitasaun ba Sede Suku hamutuk 23, entaun PNDS tau orsamentu ba reabilitasaun sede Suku," dehan Diretóra PNDS Munísipiu Baukau, Amelia Maria Viegas iha kna'ar fatin vila nova, tersa (26/04).
Kompostu husi Sede Suku 9 iha Postu Adminisitrativu Baguia, Suku 7 iha Postu Venilale no Suku 6 iha Vemase.
Projeitu reabilitasaun ne'e, ékipa PNDS konklui ona prosesu survey ba kada sede suku, dadaun iha ona faze preparasaun ba point, nune'e aprezenta ba Xefe do Suku sira hafoin implementa.
"Wainhira sira ba survey sede Suku, sira ko'alia ho Xefe Suku sira kona-ba saidá mak presiza atu halo iha reabilitasaun, tanba sede Suku balun foin mak troka kalen, kalen sei di’ak hela karik suku hanoin atu aumenta sala ruma, troka kramik ruma, entaun sira dezenvolve fali point, bazeia ba pedidu ne'ebé hato'o husi xefe suku sira wainhira sira ba survey," nia hatete
Orsamentu reabilitasaun ba kada suku ho montante US$12.000 no projeitu sei diriji husi ékipa jestaun Suku tuir sistema PNDS.
Tuir planu projeitu reabilitasaun hahú ona iha fulan-abríl tinan-2022, tanba tarde iha prosesu transferensia orsamentu, maibé dadaun orsamentu iha ona prosesu transferensia, nune'e sei implementa iha tempu badak.
Alende mós, PNDS Baukau tinan-2022 hetan projeitu bee moos 13.
"Nia orsamentu US$40.000, kada projeitu US$3.000 ba osan operasionál, US$37.000 ba osan infraestrutura ne'e fixu ona ba projeitu 13 ne'ebé ita sei impletmenta iha tinan agora," nia informa
Enkuantu prosesu verifikasaun ba Uma Kbi'it La'ek (UKL) iha Munísipiu Baukau kontinua seidauk konklui, tanba razaun Xefe Suku balun laiha tempu, maibé kontinua esforsu konklui iha fulan ne'e.
"Iha Suku-4, nafatin iha postu Baguia, maibé ami tenta nafatin atu konklui iha fulan-ida ne'e," nia argumenta
Osamentu infreastrutura ba UKL iha Suku 59 kompostu uma 553 ho montante US$9.419.802,00 no orsamentu ba operasional hamutuk US$359.718,00.
Entertantu PNDS Baukau hahú prepara pedidu transferensia ba projeitu bee moos, reabilitasaun Sede Suku, projeitu PNDS regular, inklui UKL, nune'e submete ba Sekretáriadu hafoin transfere osan ba konta bankaria kada suku nian. (*)
