Grupu hirak ne'e hetan apoiu fundu husi Gabinete Apoiu Sosiedade Sivíl, iha Gabinete Primeiru Ministru nian no Programa Ai-Hán Mundiál (WFP).

“Ha’u konvida husi ha’u-nia kolega WFP, konvida husi SASCAS  atu vizita grupu sira ne’ebé durante ne’e sira apoia, entaun iha grupu IDOL ne’ebé manán premiu dala tolu ona, entaun grupu sira ne’e bele dehan ezemplu ke bele fó inspirasaun ba grupu sira seluk iha fatin seluk bele tuir husi prinsípiu, ita buka serbisu ba ita-nia an rasik no kria mós serbisu ba ita-nia maluk sira duké ita hein de’it husi Estadu”, dehan Primeiru Ministru (PM), Taur Matan Ruak, iha Komunikandu Imprensa ne'ebé www.tempotimor.com. asesu iha segunda (25/04).

Tanba ida ne'e, nu'udar kontribuisaun sidadaun nian mak Xefe Governu kontente tebes haree projetu sira ne’ebé ajuda hetan fonte rendimentu envés de husi kafé de’it bele ikan, modu, bua naga no sira seluk tan.

“Hanesan ohin ha’u vizita grupu kulat, ha’u espera katak atividade sira ne'e bele sai motivasaun no inspirasaun ba fali grupu sira seluk iha Timor laran”, afirma nia.

Xefe de Grupu Inisiativa Dezenvolvimentu Ortikultura Rurál, Jerónimo Barreto Soares, sente kontente ho prezensa Xefe Governu nian hodi fó motivasaun no korajem atu sira bele kontinua hakat liután ba oin.

“Atividade ne’ebé halo mak hanesan, ortikultura, aguakultura, hakiak ikan, pekuaria, preserva aí lokál, halo mitigasaun hodi hatán ba mudansa klimátika”, dehan nia.

Xefe Grupu Ermera Ai-kulat Mutin Orgániku iha suku Fatukeru, Postu Administrativu Railaku, Januário Goncalves hatete, sira-nia Grupu hari’i iha tinan 2018 mai husi inisiativa rasik tanba haree ba dezempregu no mánutrisaun as iha Timor-Leste.

“Ami haree hanesan ami na’in hira iha rekursu oituan ami bele liuhusi siénsia oituan ne’e ami aprende husi East Timor Coffe institutu hodi halo produsaun ba ai-kulit mutin hodi redúz ma nutrisaun no redúz dezempregu iha Ermera”, deham nia. (*)