Tuir informasaun ne’ebé www.tempotimor.com asesu iha loron 18 abril, katak, CCI-TL hanesan mahon ba empreza sira, tanba ne’e, iha enkontru, Prezidente CCI-TL akompaña husi ekipa hato’o preokupasaun ba MOP kona-ba pra-kualifikasaun ba empreza sira, projetu infraestrutura durante ne’e la la’o, no sistema pagamentu ba empreza sira ne’ebé ho burokrasia naruk tebes, defikulta operasaun kompaña nian.
Problema hirak ne’e mak durante ne’e empreza sira hasoru, nune’e, ho lideransa Ministru foun nian bele fó prioridade ba pra-kualifikasaun nune’e bele klasifika empreza tuir kapasidade téknika no finanseira bainhira kompete iha projetu ruma.
Iha ne’e, promove no implementa projetu infraestrutura sira tanba liuhusi implementasaun projetu mak ekonomia rai-laran no sirkulasaun osan bele la’o, presiza hadi’ak mós sistema pagamentu, habadak burokrasia atu nune’e empreza labele sai vítima tanba de’it selu projetu tarde.
Iha oportunidade ne’e, Prezidente CCI-TL, Oscar Lima, kongratula Ministru ba kna’ar foun ne’e no espera ba oin bele servisu hamutuk di’ak liután hodi serví povu no nasaun.
Ministru Obras Públika, Abel Pires hatete, sei orienta kria ekipa ida hodi tau-matan ba pra-kualifikasaun atu formaliza prosesu pra-kualifikasaun ba empreza sira hamutuk ho CCI-TL no entidades relevante.
Ba oin, Governu liuliu Ministériu Obras Públika mós sei servisu maka’as liután, halo koordenasaun servisu nune’e bele finaliza lalais síklu sira ba implementasaun projetu.
Ministériu Obras Públikas mós sei halo enkontru koordenasaun intensivu ho parte hotu, ministériu relevante hanesan Ministériu Planu no Ordenamentu (MPO) liliu Ajénsia Dezenvolvimentu Nasionál (ADN), Ministériu Finansas (MF) liliu Komisaun Nasionál Aprovizionamentu (KNA) inklui parte hotu ne'ebé iha relasaun ho implementasaun projetu infraestrutura.
Vise-Ministru, Nicolau Lino Freitas Belo hatete, kooperasaun servisu ba oin sei di’ak liután hodi hala’o dezenvolvimentu nasionál ba povu no nasaun. (*)