Ministru Finansas, Rui Augusto Gomes, hanesan mós Ministru Prezidénsia Konsellu Ministru Interinu hatete, haree ba situasaun ne’ebé akontese iha Ukránia, provoka aumentu substansiál ba folin petróleu, ho Diploma ne’e hakarak garante estabilidade presu kombustivel no hodi evita konsekuénsia prejudisiál sira ba ekonomia no ba konsumidór sira.

Tanba ne’e presiza, títulu ezesionál no tranzitóriu, atu halo intervensaun iha merkadu kombustivel, ho hanoin atu hamenus impaktu aumentu presu kombustivel ba transporte públiku no atividade fundamentál sira-seluk ba ekonomia nasionál.

“Subsídiu ne’ebé sei fó ba operadór transporte rodoviáriu públiku, ba operadór transporte aéreu no marítima nasionál sira no ba kompradór kombustivel ne’ebé maka destina ba atividade agríkola no peska nian, sei hanaran Voucher kombustivel, subsídiu ne’e sei halo liuhusi vale diskontu nian ida atu uza iha estasaun sira ne’ebé maka fa’an kombustivel ho ninia montante ne’ebé korespondente ba 100% husi valór  diferensa nian entre folin gazolina ka gazóleu litru ida, iha fulan-dezembru tinan 2021, no folin gazolina ka gazóleo litru ida iha data fo-sai Voucher kombustivel, ho konsiderasaun ba tipu kombustivel no ninia karakterístika sira”, dehan Rui Gomes, liuhusi Komunikadu ne’ebé www.tempotimor.com, asesu kuarta (13/04).

Ba diploma ne’e sei válidu to’o loron 31 fulan-jullu tinan 2022, bele mós prolonga, karik kondisaun ezesionál ba aumentu presu iha merkadu kombustivel kontinua la estavel. (*)