“Primeiru ha'u hatete ida ne'e, ita tenke aumenta plantasaun kafé, Governu tenke mobiliza matenek, mobiliza osan, iha fatin-fatin ne'ebé di'ak ba kafé, tuir natureza rai. Konforme tékniku sira hatete, ita tau kafé troka kafé ne'ebé antigu tiha ona ho kafé foun. Tanba kafe balun hanesan ai-boot loos, kafé ida ne’ebé di'ak, ita hamrik de'it ne'e bele ku'u, labele ass liu ita-nia liman, ita tenke buka halo renovasaun ba kafé iha Timor-Leste tomak, kuda foun”, dehan Horta hafoin hala'o mini kampaña iha Munisípiu Ermera, kuarta (13/04).

Bainhira halo ona renovasaun, tenke haree ajuda produtór sira, ne'ebé fukit sira-nia kafé ne'ebé la di'ak ona, atubele kuida foun, nomós antes kafé sira ne'e atu fuan, Governu tenke haree kompensasaun, liliu kria fundu kafé.

“Fundu kafé ne'e atu halo saida, ne'e ha'u ko'alia bara-barak ona, tinan lubuk ida nia laran nu’udar prezidente ha'u ko'alia tiha ona ida ne'e, fundu kafé atu proteze ho protesaun ba folin kafé nian, tanba ita la konsege kontrola presu iha nasaun hanesan Nova Iorke”, afirma nia.

Ba frustasaun iha mundu soda ne'e dala ruma folin tun sa'e, tanba depende ba sira-nia produsaun kafé, hanesan ezemplu iha nasaun Brazil ho Áfrika, kafé folin tun tanba produsaun kafé barak entaun la autoriza atu ema sosa kafé.

Tanba ne'e, Governu Timor-Leste presiza mós kria fundu kafé, atu nune'e kafé internaisonál folin tun, mak Governu labele autoriza ema sosa kafé ho folin tun, no Governu sei uza fundu kafé mak sosa ho folin as, atu nune'e se mak hakarak sosa tenke sosa tuir folin ne'ebé mak estabelese.

“Se mak hakarak sosa duni, entaun tenke sosa tuir folin ne'ebé Governu estabelese, mak folin aas, se la'e ita rai iha armajen, kuandu merkadu internasionál folin sa'e, ita hasa'e”, esplika nia.

Ho folin kafé ne'e, bele mós halo investimentu hanesan mós ho veteranu sira ne'ebé iha fundu veteranu rasik, sira bele halo investimentu iha fundu kafé ne'e.

"Tanba produtór sira depois tau osan mós iha fundu kafé, hanesan sosiu, e osan ne'e tau iha banku, sei hetan funan, entaun bele fahe funan ne'e ba produtór sira, aleinde folin $5, folin be simu tiha ona sei bele hetan tan funan tinan-tinan”, afirma nia.

Kona-ba esperiénsia ne'e, Horta rasik ho amigu ida husi Nasaun Amerika, Hong Kong, ho Grupu ida naran Hummingfish Foundation, ba sosa kafé iha Laklubar, folin as no di'ak, no kafé ne'e sira lori ba fa'an iha Hon Kong, ema ho folin ne’ebé boot, kada fulan tolu ho fulan neen, liu tiha ema fó tan estra ba produtór sira iha Laklubar, maske modelu ne'e protótiku ida ne'eb ki'ik, maibé nia valór di'ak tebes.

Tanba ne'e, apoiante sira fó votu, mak kandidatu Prezidente Repúblika, Horta sei kumpre asuntu tolu ne'ebe iha, ba dahuluk mak violasaun konstituisaun ne'e rezolvidu, daruak problema maioria Parlamentu, no datoluk formasaum Governu foun.

“Entaun ita buka servisu maka’as ba oin, hako'ak ema hothotu, laiha eskluzaun, laiha deskriminasaun, hako'ak ema hothotu, tenke tama iha Governu, siknifila ita halo diálogu, ita buka kolabora, rona sira-nia opiniaun, rona mós FRETILIN nia hanoin, rona partidu sira selu-seluk, partidu sira ne'ebé la asentu mós rona”, hatete nia. (*)