Tempotimor (Dili)-Ministru Asuntu Parlamentár no Komunikasaun Sosiál (MAPKomS), Francisco Martins Jerónimo hatete, sei halo identifikasaun ba lista jornalista liña frente ne’ebé haruka fila husi Ministériu Finansas (MF).

“Ha'u husu ba jornalista sira tenke jujur, sira ne'ebé la'ós jornalista tenke dehan la'ós jornalista, sira ne'ebé mak jornalista dehan jornalista mak ne'e. Tanba lista ne'ebé haruka husi Ministériu Finansas ne'e ha'u haree ona, no ha'u sei halo identifikasaun filafali”, dehan Ministru Francisco, iha Palásiu Governu, kuarta (13/04).

Tanba lista ne'ebé haruka fila husi Ministériu Finansas (MF), ne'e identifika katak, la'ós de'it jornalista, operadór kamera no motorista, maibé inklui mós pesoál administrasaun hanesan aprovizionamentu, rekursu umanu, no lojistika inklui mídia oficcer Gabineti Ministru Prezidente Konsellu Ministru.

Ba lista pagamentu remuneratóriu ne'ebé haruka fila husi Ministériu Finansas ba MAPKomS atu halo identifikasaun hodi haree tuir lei ne’ebé iha, hafoin submete fali ba Ministériu Finansas hodi halo pagamentu.

“Sim ha'u sei submete ba fali Ministériu Finansas, maibé tanba, aban ba oin ne’e atu ferias ona entaun hein oituan”, dehan nia. (*)